Polîtîkayê çinîkerdiş û bêvengkerdişê rojnameger û dezgeyê çapemenîye yê dewleta tirk domîyenî. Tewr peynî 26ê tebaxe de bi KHKyêkê ajansê dîhaber, rojnameyê Rojeva Medya û Şûjinî ameyî padayîş.
Babete ser o rojnamegerê cinîyî yê ke Kantonê Efrînî de xebitîyenî, qisey kerdî û vera nê polîtîkayanê dewleta tirkî de reaksîyon nîşan dayî.
Muxabîra rojnameyê Ronahî Avaşîn Îbrahîme dîyar kerde ke dewleta tirk bi raybazanê cîya-cîyayan hêrişê îradeya şarê kurd kena û wina domnaye: “Dewleta tirk bêmaben hêrişê Kantonê Efrînî kena û nêşena serbikewa. Wazena cayanê bînan de serbikewa, cok ra hêrişê çapemenîye kena. Ma rojnamegerî do heme ca de xover bidî û ma do sere nêronî.”
Polîtîkayî teberê huqûqî de yî
Muxabîre û xebatkara Radyoya Avrînî Canê Sîdoye va ‘dewleta tirk bi sîyasetê xo yo dagîrkerî mora xo daya tarîx ro’ û wina dewam kerde: “Dewleta tirk vera kurd û çapemenîya azade de bi serran o polîtîkayê qirkerdiş û çinîkerdişî xebetnena. Kesê ke vengê xo vejeno, beno hedefê dewleta tirk. Dewleta tirk tewr peynî rojnameyê Şûjinî padaye û bi no hawa waşte gemarîya xo binimina. Çimkî Şûjin vengê heme cinîyan bî. Ma do ser xeta Gurbettellî Ersoze, Denîz Firate û heme şehîdanê çapemenîye de bimeşyî."
Ê nêşênî vengê raştîye bibirnîy
Muxabîra ajansê ANHA Cîhan Omere zî hêrişê ke vera çapemenîya azade de benî şermizar kerde û wina va: “Dewleta tirk reya sifteyîne nîya ke hêrişê çapemenîye kena. Xeylê ajans û rojnameyê kurdan raştê hêrişê dewlete yenî. Do qet vengê heqîqetî nêro birnayîş. Ma rojnamegerî do heta peynî xover bidîy û raştîye biresnîy şarê xo. Nimûneya xoverdayîşî rojnameyê Welatî yo ke bi manşetê ‘Nêşikîyeno û Nêkeweno’ dest bi weşanî kerd.”
EFRÎN - ANF