Peynîya weçînayîşê 1’ê Teşrîne AKPe veng nêvindet; hewna hêrişê şarê kurd kerd û dijî nê hêrişan zî KCKe zî seba pawitişê şaranê Kurdistanî bira bêçalakîtîye nêçare qedêna. AKP sifteyin Farqîn û pêroyîya Kurdistanî de cenî, ciwan, extîyar û domanan qetil kena. Şarê Kurdistanî zî dijî nê hêrişan xo çarçiweya xorayîrberdişî de pawenî. Babete sero Endama Koordînasyonê KJKe Besê Erzîncan şîrove kerd.
Projeya HDPe
Endama Koordînasyonê KJKe Besê Erzîncan bal ant ser hêrişê çapemenîya AKPe ya ser HDPe û wina vat: “Heme nê hêrişê AKPe nîşan day ke projeya HDPe çiqas şert a, çi heyf ke weçînayîşê 1’ê Teşrîne binê antîdemokratîkî û hovaneye de vîyart. Ser şarê ma hêrişê gird amey viraştiş û bi hezaran ciwan û cenîyê ma bi înfazo bêdariz amey qetilkerdiş.”
HDPe ra eciz bîyî
Endama Koordînasyonê KJKe Erzîncan vat ke hêzê mîyanênetewî averşîyîşê HDPe ra eciz bîyî û wina domna: “Binê nê hêrişan de zî no ecizî esto. Hêzê kapîtîlastî qet nêwazenî hêzêko xo mîyanê şarî de bigîro. No sero ra zî nê hêzî tersayî ke projeya HDPe Rojhîlato Mîyanên ra vila biba û no semedî ra zî vernîya vilabîyîşê HDPe bigîrî hektarî dayî AKPe. La no armancî înan sernêkewt û HDPe projeya xo reyde netîceya weş girewt.”
Wekîlê cenîye yê HDPe
Besê aşkera kerd zereyê HDPe de cenîyî roleko muhîm kay kenî û taybetê pergalo faşîst ser HDPe hêrişê pergalê hemserekî keno û wina vat: “Xora ravêreyeya weçînayîşî de hemsereka HDPe Fîgen Yuksekdag ra dorûverê faşîstî hêrişê fekî û nuşteyî kerdî. Pergalê hemserekî biratîya şaran û têkoşînê azadîye ra mewzîyeko gird o. Eke zereyê HDPe de rayvistişêke cenîye aver şîro do cenîyî Tirkîyaye ra bibî omid. No semedî ra zî tewr gird debar kewena milê wekîlê cenî yê HDPe. Lazim o wekîlê cenîye yê HDPe bikewî zereyê xebatêko cidî û plankerde, encax eşkenî bi no rayîrî bibî verpers û serbikewî.”
Wa heme cenîye verê hegemonyaya AKPe têkoşîn bidî
Besê Erzîncan îzeh kerd ke semedê averşîyîşê aştî, demokrasî û azadîye, cenîyî zey hêzo dînamîk î, cenîyê Tirkîyaye tirk, kurd, ermenî, suryanî, çerkes, elewî û azerîye bi hembar dijî AKPe şerto ke têkoşîn bidî û wina dewam kerd: “Hindî cenî şert o ke pergalê xo yê xopawitişî înşa bikera. Ma şert o ke gamê bi bire aver şîrî û qet têkoşînê xo ra fek veranêdî. HDPe de rayvistişê cenîye zî wa heme cenîyê Tirkîyaye ra bibo numine û no ser zî tewro gird debar kewena milê wekîlê HDPe cenîye.”
Serkewtiş hîna zaf rayvistiş reyde beno
Besê Erzîncan destnîşan kerd ke dijî hêrişê AKPe êy do bibî verpers û wina verdewam kerd: “ No semedî ra zî lazim o cenîyî dijî faşîzmê AKPe xover bidî. Ma cenîyê kurdî her tim dijî hêrişan xover danî, no ser zî ma dijî faşîzmî têkoşîn senî yeno dayîş, zanî. Xoverdayîş kokê ma de esto. Ma dijî hêrişan do hîna zaf bixebitî, hîna zaf xover bidî, hîna zaf çalakî û rayvistiş bikî. Na herre hîna zaf azadî, demokrasî û aştîye heq kena. Wa qet etîrê ti kesî nêbo, ma nînan pratîkê xo de do nîşan bidî.”
NEWROZ DIJWAR / JINHA