MAHÎR YILMAZKAYA / ANF / BEHDÎNAN


Endamê Komîteya Caardişî ya PKKyî Mustafa Karasuyî derheqê averşîyayîşê ke Rojawan, Sûrîye,  Vakurê Kurdistanî de benî û sewbîna zaf babetan ser o qisey kerd û vînayîşê xo ard ziwan. 

Endamê Komîteya Caardişî ya PKKyî Karasuyî va ‘dewleta tirk vana qey bi bikarardişê îmkananê xo vera gerîla de do netîce bigîra, labelê vera tarzê bi hawayo fedaî şerkerdişî de nêşêna netîce bigîra’ û wina dewam kerd: “Faşîzm ewro wazeno demêko kilm de netîce bigîro, labelê gerîlayê azadîye bi xoverdayîşê xo vernîya waştişê ci de benî asteng. Dewleta tirk herçiqas ke hende hêriş kena, reyna zî nêşêna netîce bigîra. No zî yeno manaya faşîzmê AKP û MHPyî vera gerîlayanê ma de kewto tengasî û zorê ci şîyo. Xora vatişê Erdoganî yê ‘kura de beno wa bibo, ma do hêriş bikerî, zimistan-hamnan ferq nêkeno’ zî nîşan dano çiqas kewto mîyanê tengasîye. Beno ke ameyoxe de tena Bakur de nê, Başûr û Rojawan de zî dewleta tirkî reyde şer bibo, gerîla seba nêyî amade yo.”

Karasuyî qiseykerdişê xo de qala Delal Amede kerd û wina va: “Delal Amede Komîteya Merkezî ya PKKyî, Komîteya Caardişî, Komîteya Caardişî ya PAJKî de, HPGyî mîyan de û sewbîna cayan de wezîfe girewte. Tewr peynî şîye Botan û Fermandarîya Botanî de ca girewte. Tîya de hêzê dagîrkerîye reyde kewte şer û 12 embazanê xo reyde şehîd kewte. Delale Amede fermandarêka girde bîye. Aye bi na vindetişê xo heme cinîyan rê bîye finak. Her yewe şehîdê ma beno erj û hêz, beno sebeb ke êdî ma çinî nêbî. Eke têkoşîn de embazê sey Delal Amede şehîd kewenî, êdî çinîbîyayîşê ê şarî mumkin nîyo. Heta nika bi deshezaran şehîdê ma bîyî, nê şehadetî do ma biresnî ameyoxa azade. Serra 40. ya PKKyî de qerarê heyfgirewtişê Delal Amede û 12 embazan ame girewtiş û sondê ci ame werdiş.”


Ma weşî û ewleyîya Rayberîye de zaf hesas î

Karasuyî qala tecrîdo ke Ocalanî ser de yeno bicaardiş kerd û wina va: “2016 de 15ê Temmuze ra dima tayê xeberî ameyî parekerdiş û goreyê ê xeberan Îmrali de tayê rewşê cîyayî bîyî. No het de hem tevger û hem zî şarê ma zaf hesas bî. Cok ra ma waşt ke wa pêvînayîşî bibî. O wext pêvînayîş bîbî û Rayber Apoyî birayê xo ra cigirîyabî û vatbî ‘Ti çira ameyî, kamî to erşawite, dewlete yan zî embazan to erşawite?’ Nika zî derheqê weşî û ewleyîya Rayber Apoyî de tayê xeberî vejîyayî. Wexto ke merdim nê xeberan ra ewnîyeno, wextê ci tayê bala merdimî anceno. Wazenî vernîya tayê çîyan bigîrî. Seba ma hemînan weşî, ewleyî û azadîya Rayber Apoyî rojeve de yî. Weşî û ewleyîya Rayberîye seba ma hertim sebebê têkoşînî yo. Ewro têkoşînê ke seba azadîya şarê kurdî û weşî, ewleyî û azadîya Rayber Apoyî yenî dayîş kewtî têmîyan. Ma her di têkoşînan yewbînan ra cîya nêkenî.”


Xeta Rayber Apoyî dîyarker a

Karasuyî qiseykerdişê xo de bale ant ser rewşa Rojhelato Mîyanênî ser û wina va: “Rojhelato Mîyanên de hêzê statukoperestî û Tevgerê Azadîye do hertim mîyanê pêrodayîşî de bibî. Labelê rewşa Iraqî do wina dewam nêkero. Iraq de têkoşîno sîyasî do bidomîyo. Çimkî Iraq de hîna îstîkrar awan nêbîya. Ganî no zî bêro zanayîş ke heta ke Îran û Tirkîya de nizdîbîyayîşêko demokratîke nêvejîyo orte, Rojhelato Mîyanên de aştîyêka mende mumkin nîya. Nika Sûrîye de warê ke HSD tede hakim o û warê ke rejîmê Baasî tede hakim o û warê ke artêşa tirk û çeteyê ke girêdayeyê ci yî hakim î, estî. Na rewşe zî bîya problem. Çimkî estena Tirkîya ya Sûrîye de aştî û îstîkrarî tehdît kena. Amancê dewleta tirkî çinîkerdişê kurdan o. Rûsya û Îran sey Tirkîya nêfikirîyenî. Cok ra merdim nêşêno vajo Soçî de çareserîyêk vejîyena orte. Çimkî Soçîyêka ke kurdî tede çin î, nêresena serkewtişî. Cok ra tesilî ganî kurdî Soçî de bibî.”