Çalakîya grevê vêşanî ya Nurîye Gulmene û Semîh Ozakçayî ke seba tepîya agêrayîşê karê xo daybî destpêkerdiş, roja 168. de dewam kena. Çalakgerî Nêweşxaneyê Zîndanê Sîncanî de yenî vindarnayîş. Pêvînayîşo ke ganî rojêk de 7 saet bo, ancax 2 saetî yeno kerdiş. Babete ser o Avûkate Ayşegul Çagataye qisey kerde û bale ante rewşa Nurîye Gulmene ser.
Avûkate Çagataye va ‘badê ke ewnîyayox ame qebulkerdiş, Gulmene û Ozakça hîna tay betilîyenî’ û wina dewam kerde: “Ganî rojêk de 6-7 saet çîyê awin bişimîy. Cok ra hewanayîşê şûşeyan daxî seba înan zaf zor bî.”
Tehdîtê ‘mudaxaleyê bi zorî’
Çagataye dewamê qiseykerdişê xo de bale ante zext û tedayê ke vera Gulmene û Ozakçayî de zêde bîyî ser û wina va: “Doktorê nêweşxaneyî muwekîlanê ma bi ‘bi zorî mudaxale’ tehdît kenî. Pêvînayîşê ma de Gulmene mi ra va ‘Doktorî ma ‘bi zorî mudaxale’ reyde tehdît kenî û ma zanî ke nê tehdîtê peyênî nîyî. Ma do prosesî dîyar bikerî. Ez heme çîyî xo vîra bikera zî nê zulmo ke bi ma ame kerdiş, ez xo vîra nêkena. Eke mudaxale bikerî û ez bêra hişê xo ser, ez do reyna ê serumî biveja û bierza. Ez do grevê xo bidomna, heta ke waştişê mi qebul benî’.”
Hesasîyetê aye zêde bî
Çagataye derheqê rewşa Nurîye Gulmene de malumatî dayî û wina va: “Seba ke Nurîye vera şewqî de hesasîyetê aye zêde bîyo, şewqî ra eciz bena. Doktoran ra yewe aye ra vano ‘ma do camanê şima rê perdeyê tarîkerdişî pabikerî’ labelê heta nika çîyêko winasî nêameyo pakerdiş. Çermê înan de rizîyayîşî benî û çermê înan zaf barî bîyo. Seba rizîyayîşê çermî, ê hewl danî rûn bisawî çermê înan. Derheqê kitab û rojnameyan de problemî dewam kenî. Rojnameyê ke verê cû dîyayênê înan, nika netîceyê nizdîbîyayîşê kêfî yê gardîyanan de nêdîyenî înan.”
Çagataye peynîya qiseykerdişê xo de va ‘ma her roje waştişnameyê tehlîyeya înan danî’ û wina qedênaye: “Mehkemeya Heqê Merdiman ya Ewropa (AÎHM) derheqê Komîsyonê OHALî û neheqîyan de nizdîbîyayîşê xo nîşan daye. AÎHMî hetê şarî de qerar nêda. Ganî ma wayîrê Nurîye û Semîhî bivejyî. Ma heme rayîrê huqûqî ceribna, ma do nê rayîran bidomnî.”
ANQARA