BERÎTAN CANOZER/ŞÛJIN/AMED
Qezaya Sûrî ya Amedî de rijnayîş bêmaben dewam keno. Taxa Alîpaşa de se ra 70ê taxe ameyo rijnayîş. Vera rijnayîşî de tena kesê pîlî nê, domanî zî reaksîyon nîşan danî. Çimkî cuya sîteyî ser domanan de zî yena ferzkerdiş, labelê heta nika seba domanan cayê biewle nêameyî peydakerdiş. Domanî sîteyan de bi hawayo rehet nêşênî kay bikerî, raştê îstîsmar, tecawiz û tiryakî yenî. Elîfa 9 serreyî vera rijnayîşî de vana ‘ma Licê de ronîşenî labelê her hewte yenî tîya. Ez Sûr û Licê ra zaf hes kena. Ma nêwazenî Sûr birijîyo. Ma verê cû kayê nimitike kay kerdêne û cayê ke ma xo binimitêne zaf bîy. Labelê heme cayî rijnayî. Wa Sûrî newe ra bivirazî.”
Tîya taxa ma ya
Berato 11 serreyî zî seba nêşêno pisiqlet biramo, gerre keno. Berat wina va: “Çira şima keyeyanê ma rijnenî? Ma zî keyeyê şima birijnî, weşê şima şono? Ez wazena pisiqlet birama. Ez nêwazena Sûr birijîyo. Ma nêwazenî daîreyan de ronîşî.”Berfîna 13 serreyî zî va ‘ez nêwazena embazanê xo ra biqerfîya’ û wina dewam kerde: “Ez sîteyan ra hes nêkena, qet weş nîyî. Tîya de tim meymanê ma yenî. Nika seba ke rijnayîş esto, meymanî kêmî bîy. Wa Sûrî nêrijnî. Mizgîna 9 serreyî zî va ‘eke Sûr birijnî, ez do kamî reyde qisey bikera’ û wina domnaye: “Çira ma bêkeye verdanî. Ma tîya de zaf kêfweş î. Ez destûr nêdana ke keyeyê ma birijnî.”