Problemanê tewr girdî yê Tirkîya ra yewe zî hûmara domanê ke xebetîyenî ya. Hûmara nê domanan bi destpêkerdişê tehtîlî zêde bîya. DÎSKî dîyar kerd ke nê şert û mercî averşîyayîşê domanan ser de tesîrêko xirab keno û va ‘no het de kontrolî zaf kêmî yî. ’
Goreyê Rêxistina Xebate ya Mîyanneteweyî (ÎLO) kesê ke 15 serreyî ra şenik î û xebetîyenî, doman hesibîyenî.
Raporo ke DÎSKî goreyê daneyê TUÎKî amade kerdo de asîyeno ke hedîse çiqas muhîm o. Goreyê raporo ke hetê DÎSKî ra ameyo amadekerdiş, kesê ke mabênê 15 û 17 serreyî de yî û xebetîyenî, se ra 80ê înan bêqeyd yenî xebetnayîş. Goreyê raporî Tirkîya mîyanê 24 welatanê Ewropa de bi rêjeya ser a 25,30 û rêza tewr peynî de ya. Reyna rapor de yeno vatiş ke karkerîya domanan netîceya kêmanîya polîtîkaya dewlete ya seba pawitişê domanan de vejîyena orte. Goreyê raporî rêzanê sifteyînan de welatê Ewropa sey Danîmarka, Fînlandîya, Swêd û sewbîna welatî estî.
Babete ser o Hemserekê Hûmara 2î ya DÎSK/Genel Îşî ya Şûbeya Amedî Hasan Hayrî Erogluyî qisey kerd.
Mergî zêde bîyî
Erogluyî va ‘her çiqas ke 3 parî ra yewe parê welatî doman bibîy, reyna zî domanî perwerde, weşî û aktîvîteyanê sosyalan ra dûrî pîl benî’ û wina dewam kerd: “Domanê ke bi hawayo bêqeyd xebetîyenî, mergî reyde rî bi rî manenî. Seba ke welat de feqîrî bi hawayo cîdî yena cuyayîş û vindetişê keyeyan sebebê zêdebîyayîşê na hûmare yo. Zafaneyê nê karkeranê domanan beşa înşaat û sanayî de yenî xebetnayîş û seba ke kontrol zaf kêmî yo, mergî her ke şono zêde benî.”
Dagîrkerîya keda domanan xorî bîya
Erogluyî dewamê qiseykerdişê xo de va ‘Rojhelato Mîyanên de û bitaybetî zî şero ke Sûrîye de yeno cuyayîş ver, domanê ke welatê xo ra koç kerdî, cayê ke şîyî de bi şert û mercanê zaf zehmetinan de cuyayîşê xo domnenî’ û qiseykerdişê xo wina domna: “Problemê karkerîya domanan yê Tirkîya bi ameyîşê domananê Sûrîye hîna gird bî. “
Domanî mirenê
Erogluyî peynîya qiseykerdişê xo de qala nebesîya tedbîran kerd û vatişê xo wina qedêna: “Domanî bi emrêko zaf şenik de dest bi xebetîyayîşî kenî û no zî hetê averşîyayîşê înan yê fîzîkî û ruhî de tesîrêko xirab keno. Seba ke tedbîrê ke yenî girewtiş bes nîyî, domanî qezayê karî, nêweşîyê meslegî û sewbîna probleman reyde rî bi rî manenî. Patronî domanan sey haletî vînenî û domanan ra vîşêr hîna zaf qîmet danî makîneyanê xo. Goreyê daneyanê Meclîsê Ewleyî û Weşîya Karî 2016 ra nata 56 domanî netîceyê cînayetê karî de merdî.”
DÎHABER/DERSIM