Baroya Edene de Serekê Komîsyonê Hepisxaneyan Avûkat Tugay Bekî derheqê domanê ke Hepisxaneyê Edene de şewatî ver birîndar bîbî de wina va: “Domanî travmayêko cîdî cuyenî”
18ê çileyî de domanê ke Hepisxaneyê Tîpa E yê Edene de koguşê domanan de mendêne, nivînanê xo veşnaybî û netîceyê şewatî de domanê bi nameyê Muhammed Erdogan û Ferhat Kayayî merdbî, 1ê xo bi hawayo giran 3 domanî û 5 karmendê hepisxaneyî zî birîndar bîbî. Serdozgerîya Komare ya Edene derheqê şewatî de tehqîqat daya destpêkerdiş. Çarçeweya tehqîqatî de heta nika îfadeyê 3 domanan û karmendanê hepisxaneyî ameyo girewtiş.
Baroya Edene de Serekê Komîsyonê Hepisxaneyan Avûkat Tugay Bekî babete ser o qisey kerd
Neqlê eynî hepisxaneyî bîyî
Avûkat Bekî qiseykerdişê xo de va ‘ma sebebê şewatî nêzanî’ û wina domna: “3 domanê ke tedawîya înan qedîyaya, reyna erşawîyayî hepisxaneyî û nînan ra yew sewqê Hepisxaneyê Domanan yê Sîncanî bîyo. Sucê înan se beno wa bibo, ganî domanî nêameyênê tewqîfkerdiş. Çi heyf ke domanê ke şewatî ra xelisîyayî, reyna erşawîyayî hepisxane. Domanî bîyî şahidê mergê domananê bînan, no hetê psîkolojîyî de çîyêko giran o.”
Kutiş maqul û normal o
Bekî dewamê qiseykerdişê xo de va ‘bitaybetî ma waşt ke ê hepisxaneyî de çi qewimîyayo, bimusî’ û wina dewam kerd: “Çi heyf ke domanan tersan ver çîyêk nêva. Goreyê mi domanî hema zî binê tesîrê ters û zextî de yî. Çimkî wexto ke ma israr kerd, domanan va ‘wextê kewtişê hepisxaneyî de tena 1-2 şekmatî dayî ma ro û no zî çîyêko normal o’. Ganî nê domanî bi hawayo lez serbest bêrî veradayîş. Çimkî ancax bi şert û mercê azad de merdim eşkeno hepisxane de çi amebî cuyayîş, domanan ra bimuso.”
Dîmenî do roşn bikerî
Bekî qiseykerdişê xo de bale ant piştîdayîşê psîkolojîk û soysalî û wina va: “Ganî piştîdayîşê sosyal û psîkolojîk bidîyo domanan, labelê nîno dayîş. Ma do sey Baroya Edene tehqîqatî taqîp bikerî. Dozger tena bi persê ‘şewatî kam vet?’ tehqîqatî şopneno. Ganî no hedîse ser o bi hawayo hîra cigêrayîş bêro kerdiş. Ganî sedemê ke domanan ver bi vetişê şewatî berdo, ser o bêro vindetiş. Nika destê ma de zanayîşê başî çin î. Eke kamerayê ke mîyanê hepisxane de yî, bêrî temaşekerdiş, do hedîse roşn bibo.”
Ganî kontrol bibo
Bekî peynîya qiseykerdişê xo de wina va: “Ma nêzanî hedîse ver kam ameyo dûrîvistiş û ma do derheqê hedîseyî de raporêko hîra amade bikerî. Sere de Hepisxaneyê Tîpa E yê Edene û xeylê hepisxaneyî bi îşkence, derb û muameleyo xirabin rojeve de yî. Seba ke vernîya nînan bêro girewtiş, ganî denetîmêko xoser bêro awankerdiş. Ganî Baroyan rê heqêko winasî bêro dayîş. Ganî astengîyê ke vernîya xoresnayîşê hepsîyan yê avûkatan bêrî wedarnayîş. Reyna wezîfedarê ke vera hepsîyan de muameleyo xirabin kar anî, bêrî cezakerdiş. Ma bawer kenî ke ancax o wext îşkenceyî cuya ma ra vejîyenî.”
DÎHABER/EDENE