Jû Tuncelî esta jû zî Dersîm. Dersîm sembola xoverdayîş û rindekiya ya.

Tuncelî zî sembola teslîmiyet û îxanet ya. Dersîmizan seweta kamiya xo, seweta rindekiya weşiye do pêro û danê pêro. Tuncelîzan zî her tim lewê qetilkaranê dersîmizan de ca gureto, sarê rayveranê xoverdayîsê Dersîm cira kerdê, berdê teslîmê qetilkaran kerdê. Tuncelîzî aynî waxt de Sey Rizayî yadkenê, hama lew nanê Ataturk dest ra. Honde qilêrin yê.
Ver ra niya bî ewro zî niya ro. Teyna seserre vuriye, zovîna tewa nêvuriya. Azê îxanetkarî gonya xo da azê neweyî yê Tuncelî. Domonanê Tuncelî de na gonî esta. Domonanê Dersîm de zî gonya xoverdayîşî. Dersîmizî qeyta teslîmê dewleta tirkî û partiya qetilkare CHP nêbî. Hama tuncelîzî xelesa xo CHP de vînenê.
Serokê CHP jû tuncelîz o. Kemal Kilçdaroglu serran ra avê qetilkarê dersîmizan Îhsan Sabrî Çaglayangîl de jû roportaj virasto. Îhsan Sabrî Çaglayangîl na roportaj de vano “Ma dersîmizî kerdî esket jê meru axu kerdî.” Pekî no serokê partiya qetilkare ewro se vano? Vano “Ma zelal kerdena na mesela gune tarîxnasan rê verdîme.” Zîhniyetê tuncelîzan niya ro. Seweta jû kirşî, seweta pazê nonî qirkerdena cedê xo înkar kenê. Çapemeniye de xeverî vejînê û nuşîno, ke 38 de eskeranê dewleta terorîste canikanê dersîmizan rê tecawiz kerdo, tuncelîzan ra kes nêvano “na kerdena CHP wa.”
Taye domonunê Tuncelî weçînîtîsê 2011 de Dersîm de jû pankarte bi zonê ma û seweta “xêr amayena” serokê partiya qetilkare, Kemal Kilçdaroglu, darde kerde. Kemal Kiliçdaroglu Anqara de hesna, desinde ferman da û vat “ A pankarte ronê!” Nika serokê nî tuncelîzan Kemal Kiliçdaroglu vano: “Zonê mayan de perverde nêbeno, welat beno leteyî” tuncelîzan ra vengê nêvejîno. Firsad pînê, ke sarê dersîmizan cira kerê û birosê. Zovîna manê na bêvengiye çîno. Taye tuncelîzan Avrupa de wendo, 38 sero doskariyte virazenê, hama seweta CHP gureyenê.
Tuncelîzî rasîst yê. Her serre Dersîm de jû festîval virajîno. Hetê program ra kemiya xo esta çîna, na mesela niya. Her kar perfekt nêbeno, kemiye bena.
Hama waxtoke tuncelîzî qesey kenê, fekra qefçiliye û rasîzm vorenê. Sarê Colemêrg, sarê Çewlîg, sarê Amed  nêwazenê. Teyna aşîra xo wazenê.
Rind ke amedizî, çewlîgizî û colemêrgizî ma teyna nêverdanê. Nî tuncelîzî wazenê ma jê 38 teyna verdê û teslîmê partiya qetilkare CHP kerê.