Parlamenterê HDPyî Omer Faruk Gergerlîogluyî derheqê prosesê OHALî de qisey kerd û qala neheqîyan kerd. Gergerlîogluyî va ‘Îqtîdarê AKPyî ra dima Tirkîya normê huqûq û demokrasî ra dûrî kewte’ û wina domna: “Pawitoxê heqê merdiman daxî ameyî ceza kerdene. No zî nîşan dano çiqas donemêko zehmetin o. Ma do nika ra pey zî seba heq û edaletî bixebetyî.” HAYRÎ DEMÎR MA/ANQARA Qanûnê OHALî (Rewşa îstîsnayî) ke bingeyê ci Qanûno bingeyîyê 1982î reyde ame eştene, 1987 ra heta 2002î 46 reyan bi qerarê Meclîsî ame derg kerdene. OHAL 15ê Temmuze teşebusê derbe ra dima reyna ame îlan kerdene. Nika zî yeno pawitene ke 18ê Temmuze de OHAL biqedîyo. Heta nika OHAL bi sebebê tabloyêka girde. Wextê OHALî de pêro pîya 36 Qerarnameyê Hukmê Qanûnî de (KHK) ameyî îlan kerdene û nizdîyê 140 hezar karkerî karî ra ameyî îxraç kerdene. Nînan ra tena 3 hezar 752 kesî tepîya agêrayî karê xo. 50 hezar 510 kesî ameyî tewqîf kerdene. 5 hezar 295 akademîsyenî bêkar mendî, 166 dezgeyê çapemenîye, hezar 431 komele û weqfe ameyî padayene. Babete ser o Parlamenterê HDPyî yê Kocaelî Omer Faruk Gergerlîogluyî qisey kerd. Gergerlîogluyî prosesê OHALî ke wedarnîyayîşê ci yeno pawitene, sey donemê trajedîyî şinase kerd. Gergerlîogluyî va ‘çîyê ke bi sehezaran merdiman cuyayî, donemo tewr trajîk yê Tirkîya bi’ û wina dewam kerd: “Tirkîya donemêko giran derbaz kerde, labelê heta nika donemêko winasî qet nêame cuyayene.” Îqtîdarî açarna firsendî Gergerlîogluyî dewamê qiseykerdişê xo de wina va: “Îqtîdarê AKPyî ra dima Tirkîya normê huqûq û demokrasî ra dûrî kewte. Bitaybetî 15ê Temmuze ra dima bi temamî demokrasî û huqûq ra dûrî bîye. OHAL ame îlan kerdene û tabloya welatî açarîyaye felaket. KHKyê ke ameyî îlan kerdene, heme muxalîfan hedef girewtî. Ma roja sifteyîne ra dime hişyar kerd û rexne kerd. Îqtîdarê AKPyî herinda ke tayê çîyan bibedilno, OHALî sey firsendî girewt dest.” Hende neheqîyî nêameyî cuyayene Gergerlîogluyî bale ant ser kerdişanê kêfîyan ser û wina va: “Badê ke OHAL ame îlan kerdene, 7 reyî ame wedarnayene. Seba ke ramitişê OHALî teberê qanûnan de yo, yeno wedarnayene. Çimkî nika Tirkîya no het de kewta tewr binî. 2 serrê peyênan de no het de tepîyaşîyayîşêko gird ame cuyayene. Êdî wina bîyo ke Tirkîya nêşêna wedarna. Cok ra wedarnayîşê OHALî reyde Tirkîya do rehet bikero, labelê problemî do çareser nêbî. Tarîxê Tirkîya de donemo ke hende neheqîyî ameyî cuyayene, nêameyo dîyayene.” Ma do fek heq û edaletî ra veranêdî Gergerlîogluyî peynîya qiseykerdişê xo de va ‘no donem donemo ke pawitoxê heqê merdiman nêşênî xo bipawî’ û wina qedêna: “Pawitoxê heqê merdiman heqanê şarî pawenî. Labelê wina bîyo ke êdî nêşênî xo bi xo bipawî. Seba ke mi qala aştîye û heqê merdiman kerd, mi zî ceza girewt. No zî nîşan dano ke çiqas donemêko zehmetin o. Ez do nika ra pey zî seba heqê merdiman têkoşîn bida. Çiqas zext û tedayî benî wa bibî, ganî ma fek edalet û sewbîna ra veranêdî. Ma heme çîyê dejinî cuyayî. Zaf tay kesan vera nînan de vindetî. Çi heyf ke partîyî heme vera nêyî de nêvindetî. HDP çi dest ra ame kerd, labelê o zî bi mexdurê nê prosesî.”