Serokê Federasyonê Alewî Bektaşî Bakî Duzgun ke hayr ant herb û pirodayişanê 40 serranê peynî ser û vist vîrî ke yê ke yenê qetilkerden tim û tim alewî û kurdî yê. Bakî Duzgunî da zonayen ke jew cayo ke cenaze nêşiyê nêmendo û aşkere kerd ke gama ke KCK eşt ganî bi hurmet bîro dîyen û qedr û qîmetê ci bîro zonayen. Duzgunî da zonayen ke pêşnîyazo ke KCK seba alewîyan ardo zon bi qîmet û erja yo û va iyê dê rexmo ke badê her gamekê haştî teqînayişê kaosî vatişê haştî ra fek nêveradê.
Teqînayiş tesadufî nîyo
Serokê ABF Bakî Duzgunî vist vîrî ke qetlîama 10ê Cotmeng yê Enqere de kî teqînayişî de hedef haştî bi û nîya dewam kerd: “Badê weşînayişê deklarasyonî teqînayişê Dîlok zî bi tesadufî nîyo. Zebanîyê şew, heskerdoxê taritî û gonîwerdî tim û tim hewl danê ke haştî manî bikerê. La ma dê haştî ra fek vera nêdê. Bi nê kerdenan nêşkenê ma manî bikerê. Eke hikûmet gama ke KCK eşt rind destpît bikero û cewabekê rind bido, ma kî na pêvaco de ca gênê û benê hetkarê haştî û azadîyan.
KCK îrade vet werte
Îdarekarê Komelê Alewîyê Demokratîk Bulent Felekoglû kî seba rakerdişê raya haştî û muzakereyan deklarasyonî ca de dî. Felekoglû vist vîrî ke KCK îradeyekê çarekerdişî vet werte û înisîyatîf girot. Bulent Felekoglû va waştenî belû yê û nîya va; bi Îmrali reyna ra destpa kerdişê pêdiyayinan, hadrekerdişê şert û mercê pêdiyayişê îtiqat û şaranê Tirkîye. Ganî pêdiyayişan de temsîlîyetê alewîyan kî ca bicêro. Na aşkerekerdiş eynî wextî de ewnayişê KCK yê hometa alewîyan kî damûsna.” Felekoglû îfade kerd ke badê deklarasyonî qetlîama ke DAIŞ Dîlok de viraşt mezgan de bî sebebê îşaretê persan û nîya va: “Na qetlîam ma rê her wextê behskerdişê çarekerdişî de qetlîaman vistişê dewre, Pirsûsî, Enqereyî ard vîrî. Aqilê selefî ke haştî nêwazeno kewno dewre. Şert o ke dewlet û hikûmet qerarekê bido. Çike pêrokîn mesûlîyet ci de yo. Cepheyê kurd kişta haştî de hirade û tewir damûsna û aşkere kerd ke do mesûlîyetê xo bîyaro ca. Nika dor ê hikûmet o.
Haştîwazî hedef de yê
Serokê Komeleya Kultur ê Alewîyê Hubyar Sûltan Aydin Denîzî zî vist vîrî ke jû serra peynî de pirodayişî tenya bi sûkanê kurdan bi sînor nêmendê, vilayê rojawayê Tirkîye zî bîyê. Aydin Denîzî da zonayen ke eke nîya dewam bikero nê pirodayişî dê sînoranê Tirkîye zî ravêrnê û nîya dewam kerd: “Ganî demê çarekerdişî reyna destpa bikero. Polîtîkayê kaos û bînîkerdişî her roj hona zerarê girdî danê. Nayî ra deklarasyonê KCK seba alewîyan kî ca de yo û ma heta peynî desteg danê. Ma welatî de endî vindernayişê gonî de hemfikir ê. Ma alewî 72 mîletî ra eynî nezarî ra ewnenê. Ma ne hesrê çiman, ne zî rijnayişê gonî nêwazenê.” Denîzî teqînayişê Dîlokî ser û va, wazenê ma bi no şeklî bişikînê. Ma dî ke kam ke seba haştî hewl dano peynîya ci xiravîn beno.
Denîzî veng da hikûmet ke desinde raya şaş ra ageyro, bikewo pêvacoyê normalî. Denîzî vist vîrî ke gama ke KCK eşt rind a û va, la eke cewabekê pozîtîf nîro dayen welat do şiro cayekê xirabîn.
DÎHA/STENBOL