Warî de roc şî xo ra bi şond wertê wara de ênê têhellewî. Qese benê derg resenê aşmî û estaran. Aşmî ke zey çila şewî kerdî roşn govendî gênê. Şop şopanî ke heş ya kî veng êna. Kewena koza, cenî vecînê teber, bêno haybro û axirser. Hetan şodir nê kunê ra. Eke nîyadê çarê çîna her şewê de cenî benî darçî. Dema ke heş bêro herî hîn zirrenî. Ti zana ke heş ameyo. Kutik nanê dim ra. Cenîya pêronî de tifing çino. Ya yew ya ke di zaf ke kewenê tengî yê hîn xo ra xelesnîyenî, çîno tifing vecîna werte. Yew de dilîm germînî goşa kena kerr.
Warê dewan pêro cayê ke çaliderê nanê ro. Va zaf êno. Dormê wara de kelê estê. Serê her koy de yew zîyarî esta. Çi çax şarê zîyara ser cenî wertê xo de yew kenê. Ha ute de di reyî hetê ser şonê. Mîyaz pewjenî û peroj ra tepîya benî top, kewenî rayîr şonê. Serê zîyara ra gulbango vanê, mîyaz kenê vila, mirdêxo çay şimenê. Cenîyeke weş lornena tayêke goşt nanê doy ser. Ver bî ke indî mal bero berîyê wurzenê ênê. Tar û tur warî de zaf o. Punî, danux, sungî, so… Danê arê anê tîjde kenê huşk, seba zimistan danê wî, ruşnenê dewê, zimistan ke çîyê pewt nê tarî û turî vecenê erzenî ci. Boya wara û keyê Bîngol kewena zerî.
Dewe de qet mal nêmaneno. Seba nê zî qatix çino. Heta jû ra germ, heta jû ra paletîyê bê qatix qet mirdî nêbenê camerdî. Îllehem gere mast, toraq, ron, penîr, sifrî de bo. Heftî de rêyî domanê warî de qêdîyo yake bîyo tikê bênê. Camêrdî qatixê kê destê cenîyanê xo gino pira wenê, hîn xebetinê.
Domanê ke qatix anê benê dima ra vanê: “Domanê doyî.” Her hewte şodir hîrê-çar domanî şodir şefeq ra maya înan kena hîşar. Her ra kena bar, şawena rayîrî dew. Şîyînî dewî ver bi cêr a. Domanê hera vazdenî hetan wertê dewê. Barên heran sivik o, warîde werdo weredîyê ra. Heta dawî beno cîrtî cîrta dîna. Herkes çîyê rûsneno dewe.
Domana rind kenê temê. Çi lazim o wa xo vîra mekerê ve vacê. Domanê doy ke kewtî wetê dewê hema kam esto verînîya înan birneno. Çîyo ke warî ra ame gênê. Persanê xo nanî tê dim ra “çi esto, çin o, çi waşto?” Domanê doy çend çî bizanê yake vîr de bimano vanê. Danê şonî domanî doy venga yewbîn danê, benê top nafakî şawenê rayîr varî. Şîyayîşî warî zehmet a. Ver bi cor şonê. Labelê doman wertê dewa ra ke vecîyay, her ara benê pîya, hebî linga şonê. Hetan merga dîyarî yewbînan rê sanika vanê. Kamcî çend resaye warî.
Dewê de ke kar qedîya, camêrdî ênê tê lêwî wertê xo de qesî kenê. Çi çax şêrê zîyara Goşkar Babayî ser. Kifş kenê. Ekî şîyîna ser Goşkar Babayî ser dewê de qet xortê ezebî nêmanenî, mîyazanê xo pewjenê ya zî sukî ra çîyî danê arêdayênê.
Estor benî bar, her benê bar şuşnenî warî. Xort û ezebî giran giran, qifle qifle dima şonê. Heta şand kulî resenî warî. Şandî warî de şahîyê esta. Govende genê, adir fireta, heta şodir bi kêf û coş ê. Şodir mixurbi de mîyazanê xo gênê şonê Goşkar Babayî ser. Dewî ra xort û azebê ke amê kulî pîya şonê. Resayê zîyarî ser gulbanga vanê, mîradê xo wazenê, tayê şenik govendî gênê. Pêyra mîyaz benê vila. Verbi peroc agêrênê ra warî ser.
Na dolime kî dest bi qurbanê anê. Keso ke şikîna yanê rewşa xo ca de ro keno. Meke la ey rê zaf eyb o. Goştê qurbanê warî ra beno vila, para her keyeyê şona. O goşt gerî bireso sifre dewê pêro. Yewbîn zerê rehet nêbeno. Xort û ezebî adira kenê wî. Sacî nanê ser. Verê her holikî ra derbas benê, yew tikî goşt wenê. A rocî kes bê goşt nêmaneno. Boya goşt nîşeno warî ser, waranê bîna ra kî enê ser qurbanan. Naye zafêrî kî cenî nêra benê. Warê cixa zaf pîya ya kî kest goştê qurbanê biwero hende rind o. Verbi şand hîn xort û azebî pîya agêrênê ra dewê. Camêrd manenê ke wa selxî bipejne. Roc-di roc camerdî xo hîn xapênenê ke uca lewê cenîyan de bimanê. Zafî hefta bîn kenê bar şanê dewê. Na nuşte kovara ‘VER BI ROC’ ra ameya girewtiş (Peynî bî)
Doy ma kî şikenî goştar bikî
Ewro tamê ê rocan nêmendo. Boya gul û çîçeg, adirê zelike şewa ke estorê asmen de benê çila… ma pişta xo çarna her çî. Şermayimî çav û cenganê xo yê ver ra. Mirdarîya bejara kerdîmê nêweş, estarê çinê, ti vanê bar kerdo şîyê. Çar koşe ma bîyo beton. Ma bi destanê xo ciberê zîndana xo sere guret. Senî qeydê ma ver xo bidîmî. Senî ardara ma îndî bimî şenik. Wayîr vecîyîna herkes ra êmana. Zonê ma koka ma ya. Ewro na kokî herçî ke şora bena zûha. Ma dest bidimî yewbîn ra kokî axu dimu ke wa newe ra kewî bo. O taw sanikanê domananê raya doy ma kî şikenî goştar bikî.