Di Kobanê de verba çeteyê DAIŞê xoverodayişê hêzê YPG/YPJ domyeno. Bi xoverodayişê Kobanê kurdan sempatîkî yê heme dinya qezenc kerdî. Seba Kobanê pêroyina dinya û Ewropayê de kurdistanijan û dostê kurdistanijan di waran de çalakîyan virazenê. Taybetê Bîelefelda Almanyayê de seba Kobanê çalakîyê gird yenî viraştiş. Di meşa Bîelefeldî de welatijê Şîlîyê Javîera Duran vat ke ey di çalakîyan de seba Kobanê agahî girewto, balê ey zî verba DAIŞê xoverodayişê cenîyan onto.
 
KORÎDOR ŞERT O
Duran wina vat: “Ez înan ra hêzê Kobanê ra serfirazê wazena. Ez bander bîya ke bi seyan cenîyê kurd, nika destê çeteyê DAIŞî de yê. Homa bikero nê cenîyan dema kilmî de azadîya xo ra biresê. Hewna Homa bikero do Tirkîya seba Kobanê destûr bido ke yew korîdor bêro akerdiş. Ganî Tirkîya no korîdorê biakero.” Hewna Ludger Kleîn zî aşkera kerd ke Kobaniyijê, şaristanê xo xobixo îdare kenê la belê hêzê heremê û hêzê emperyalist nêwazenê kobanêyij xobixo îdare bikerê û no ser zî wazenê bi çekê şarê Kobanê çin bikerê, ganî hêzê emperyalist û hêzê heremê destê xo ser Kobanê bioncê û çimkî di noca de yew pergal yena cuyayiş.
 
TÎRKÎYA TENA ŞOPNENA
Jennîfer Ebersberger zî vat ke ey zî di na meşî de zaf çik bander bîya û wina domna: “Ez bander bîya ke PKK verba DAIŞê seba şarê heremê têkoşîn dana. Çi heyfo ke hêrişêke ser Kobanê yena kerdiş Tirkîya tena şopnena. Ez wazena noca ra şarê kurd hetkarîyê xo bimojna. Bi takdîrê şerê ke şerwanê kurd verba DAIŞî danê temaşe kena. No xoverodayişê heme dinya ra tesîr kerd.” Uschî Kappeler zî ciresna ke ey qet hêrişê çeteyê DAIŞî ser Kobanê qebul nêkeno û bi tundî şermezar keno û wina dewam kerd: “Zatî çeteyan ra vatişê DAIŞ zî şaş o, çimkî nê çeteyan qetilkar û cinawir ê. En raşt zî nê çeteyan ra vatişê cinawir o. Ganî bi lezî nê cinawaran bêrê vindarnayiş. No ser zî heme sazîyê demokrat, sîyasetmedar, çepgir û roşnvîr têkoşîn bidê. Çi heyfo ke tewr gird îxracaetê çekê Almanya kena û ganî eke yew welateke DAIŞ ra hetkarî dano se ganî Almanya nê welatan ra çek nêroşo.” Kappeler bal ont ser qedexeya PKKê û wina vat: “Zatî wateya no qedexe zî nêmendo û no ser zî bêro hewanayiş. Ma zî partîyeke çepgirê, ma zî di mîyanê xo de nîqaş kenî. Tewr vêşî ma dayişê çekê ya PKK û YPG kenî. Kurdan ra di babetê xo pawiyayişê de dayişê çek şert o.
Almanya zî Tirkîyayê ra di no babetê de tade bikero û çi balo ke taybetê almanan Kobanê ra hetkarî danê.” Paplo Mendez zî welatijê Meksîka yo û ey zî xoverodayişê Kobanê ser ciresna ke: “Kurdan nika di ser sîyaseta dinyayê zey kerra vindenî. Vizêr dinya kurdan, di kesayeta PKKî de zey terorîst veynaynê. Nika kurdan verba DAIŞê têkoşîneke dîrokî danê û no xoverodayişê zî fikerê dinya bedilna. Dinya, Nato û sewbî rayvistişan zey verên ona nêfikrîyaynê. DAIŞ zey Talîban ame rayvistkerdiş, çek ame dayiş û nika zî hêzê kapîtalist wazenê DAIŞ mîyanê ra bihewanê. Zatî kam nê terorîstan xelq kerdo se o/a terorîst ê. Di Iraq û Sûrîyeyê rafîneyê petrolê ser çeteyê DAIŞî dest dest ser ronayê.

DAIŞ nika zaf zengîn yew rayvist o. Ez antî emperyalîst a la belê hêzê emperyalîst kurdan ra tade kenî. Verba kapîtalîzm kurdan têkoşîneke gird danê û no ser zî ez zî kurdan ra hetkarî dana û di hetê înan de ca gêna.” Annamarîa dest nîşan kerd ke nika di Kobanê de şer zaf dijwar o û wina qedîna: “Nika di Kobanê de lez lazimeya hetkarîyê est o. Ez zî seba hetkarîyê noca de ya. Ez her tim verba şerê bîya û di kura de şer bibo se ez her tim verba no şerê têgerîyaya. Heqê merdim esto ke xobixo bipawo, ez ta Amerîkayê Latînî yê welatê Che Guevera Şîlî ra yena. Şer tena merdişê merdiman ra semed o. No ser zî seba hetkarîyê ez ameya noca. Ez xoverodayişê Kobanê ra serifarazê wazena.”


Murat MANG / BIELEFELD