YASÎN KOBULAN / MA/STENBOL
Seke yeno zanayîş 3ê kanûna 2015î de Sancaktepeya Stenbolî de wexto ke polîsan eştbî keyeyêkî ser de, ewja de Dîlan Kortake kiştbî. Hedîse ra dima avûkatê keyeyî polîsan gerre kerdbî, labelê 101 rojî ra dima amebî vatiş ke ‘lazimî bi tehqîqatî çin a, polîsan heqê xo yê xopawitişî bi kar ardo’. Xora dima ra qerarê nimiteyî amebî girewtiş.
Badê ke qerarê nimiteyî ame wedarnayîş, avûkatan dosya rê îtîraz kerdî. Labelê Hakimîye zî îtîrazê avûkatan red kerde. Na rey zî avûkatan dosya kirişt Mehkemeya Qanûno bingeyî û nika dosya ewja de ya. Dosyaya de yeno dîyayîş ke heta ti cigêrayîş nêameyo kerdiş. Heta nika îfade û herinda engîştan yê polîsan daxî nêgirîyayo. Reyna cilê Kortake ke hetê Dezgeyê Tibbê Edlî ra ameybî waştiş de dozgerî çîyêk nêkerdo. Heto bîn ra qeydê kamerayî zî dosya de çin î.
Babete ser o avûkat Omer Çakirgozî qisey kerd. Çakirgozî va ‘wexto ke merdim hedîse ser o cigêrayîş keno, vîneno ke bi hawayo aşkere Kortake hetê polîsan ra ameya qetilkerdiş’ û wina domna: “Dozgerî 21 guleyê ke hetê zaf polîsan ra ameyî panayîş nêvîneno û vano ‘lazimî bi tehqîqatî çin a’. Nê guleyan ra ya ke tewr zaf bala merdimî ancena, guleyo ke dîyayo vileyê Kortake ro yo. No zî nîşan dano ke no înfaz o. Herçiqas ke pêrodayîş çin o zî, xeylê polîsan gule varnayo. Kiştişî ra dima sîleh û şarjor ronîyeno hetê cenaze û cile dima ra kirişîyena. Qerarê dozgeran cesaret dano qatilan.”