KENAN KIRKAYA / MA/ANQARA
Doza ke Amerîka de bi mehkemekerdişê Reza Zarrabî dest pêkerde û her ke şona hîra bena û ver bi hukmatê AKPyî şona. Seke yeno zanayîş Zarrab kerdoxîye ra derbazê şahidîye bîyo û 2 rojî verê vejîya mehkeme. Zarrabî derheqê îdarekaranê hukmatî de îfadeyê muhîmî daybî.
Babete ser o Huqûqnas û Parlamenterê HDPyî Mîthat Sancarî qisey kerd. Sancarî dîyar kerd ke ‘zaf hetê nê mehkemekerdişî estî’ û wina va: “Mabênê hetê ke Amerîka eleqeder kenî û yê ke Tirkîya eleqeder kenî, yewbînan ra cîya yî. Çîyê ke Amerîka ser de vindena, wedarnayîşê ambargoya Îranî, bêusûlîya pereyo neheqî û sewbîna yî. Mumkin nîyo ke Zarrab bi tena sereyê xo nînan bikero. Ganî dewletî mîyanê karî de bibî, xora no het de îfadeyê ci estî.”
Sancarî dewamê qiseykerdişê xo de wina va: “Tirkîya operasyonanê 17 û 25ê Kanûne ra zanayêne ke do prosesêko winasî bêro cuyayîş. Tirkîya de kulturêk esto. Vanî qey meseleyî tîya de bêrî padayîş, heme dinya nêşêna bivîna. Helbuk wina nêbeno. Bitaybetî teknolojî hende aver şîya û wextêko winasî de qet wina nêbeno. Belgeyê ke 17 û 25ê Kanûne de vejîyabî orte muhîm bî. Aye roje cemat operasyonêk viraşt û nê belgeyî bi rayîrê gayrîmeşrû ameybî destvistiş. Labelê badê ke hende belgeyî vejîyayî orte, çinîhesibnayîşê nê belgeyan mumkin nîyo. Xora ti kesî înkar nêkerd û waştî sereyê ci bigîrî. Wezîrî bi hawayo zorî îstîfa kerdî.”
Mehkemekerdiş raconê sîstemî yo
Sancarî peynîya qiseykerdişê xo de va ‘na doze, doza xo domnayîşê sîstemê kapîtalîstî ya’ û wina domna: “Sîstemê kapîtalîstî seba ke estena xo bidomno, vera bêusûlîyê pereyan de zî vindeno. Cok ra no mehkemekerdiş raconê sîstemê kapîtalîstî yo. Êdî nêşênî bi hawayo asan ser na doze bigîrî. Tîya de îfadeyê Zarrabî muhîm î. Seba ke Zarrab bişînbo xo bixelisno, ganî zaf kesî biveşî. Netîceyê na doze de qeraro ke derheqê Zarrabî de bêro dayîş, do bibo destpêkê prosesêko newe.”