Rojnamegerê ke xebatanê HDPyî û îzehetanê çapemenîye taqîb kerdêne, hetê polîsan ra ameybî tepiştene û dima ra serbest veradîyayî. Rojnameger Vedat Dagî dîyar kerd ke dozgerî qet dosya ra nêewnîya û kesê ke 10 reyî ra zêde beşdarê çalakîyan bîyî, înan seba tewqîfbîyayîşî sewqê hakimîye kerd.
Roja ke qayûmî tayînê şaredarîyanê Amed, Wan û Mêrdînî bîyî, 29 bajaran de pêro pîya 418 kesî zî amebî tepiştene. Nînan ra 84ê ci Amed de tepişîyabî û mîyanê nê kesan de rojnamegerî zî estbî. Çapemenîya HDPyî ra Rojnameger Vedat Dag zî tepişteyan mîyan de bi û badê ke 8 rojî tepişte mend, serbest ame veradayene.
Dagî derheqê prosesê tepişîyayîşê xo de qisey kerd û dîyar kerd ke emnîyet de derheqê îzehetanê çapemenîyan de înan ra persê ‘ti çira ewja de bî?’ ameyo kerdene. Dagî da zanayene ke kesê ke ameyî tepiştene bi şikê beno ke hedîseyê 6 û 8ê Teşrîna verêne bibî ameyî tepiştene û 8 rojan ra tepîya 16 persî ma ra ameyî kerdene.
Dagî va ‘nê persî heme zî derheqê xebatanê çapemenîye yê HDPyî de bî’ û wina dewam kerd: “Wexto ke mi çalakîya protestokerdişê qayûmî taqîb kerdêne, ez tepişîyaya. Mi ra persê ‘Ti çira beşdarê kombîyayîşê daşinasnayîşê namzetanê HDPyî bîyî, çira beşdarê îzehetê îttîfaqî bîyî, çira beşdarê mîtînga Rasteyê Îstasyonî bîyî, çira beşdarê 8ê Adare Roja Cinîyanê Dinya bîyî?’ û sewbîna kerdî. Herçiqas ke mi va ez xebatkarê çapemenîya HDPyî ya zî înan hewl da HDPyî krîmînalîze bikerî.”
Îzehetî ci ra ameyî perskerdene
Dagî dîyar kerd ke wextê îfadeyî de ci ra persê taqîbkerdişê çalakîyanê îzehetê çapemenîye ameyî perskerdene û wina va. “Dozgerî 8 rojan ra pey qet dosya ma ra nêewnîya û kesê ke 10 reyî ra zêde beşdarê îzehetan bîyî bi qerarê tewqîfbîyayîşê sewqê hakimîye kerd. Dozgerî qet lazimîye nêdî ke dosyayan ra biewnîyo. Çimkî îzehetê ke ez beşdar bîya, heme zî îzehetê çapemenîye bî. HDP reyanê mîlyonan girewtî. Derheqê ma de qerarê kontrolo edlî û qedexeyê tebervejîyayîşê welatî ame girewtene. Înan seba ke xebatanê ma asteng bikerî, no qerar girewt, labelê no qerar nêşêna vernîya ma bigîro.”
Roja çalakîye şima çira ewja de bî?
Rojda Aydine rojnamegerê ke Mêrdîn de çalakîya protestoyî taqîb kerdêne û ameyî tepiştene ra yew a. Aydine zî daye zanayene ke 7 rojî ra pey îfadeyê înan ame girewtene û wina va: “19ê Tebaxe de qayûmî tayîn bîyî û 20ê Tebaxe de ma ewja de çalakîye taqîb kerdêne. Polîsan hêrişê şarî kerd û ma zî bi derbkerdiş tepişîyayî. Badê ke dîmenî medya de weşanîyayî, rojnamegerî ameyî hedefgirewtene. Herçiqas ke ma dîyar kerd ke ma rojnameger î zî, înan bi hawayo verapey ma kelepçe kerd û heqaretê ma kerd. Xora dozgerîya Mêrdînî avûkatanê ma ra vato ‘Heta ke nê çalakî û aktîvîteyî nêqedyî, ez înan veranêdana’. Wextê îfadegirewtişî de ma ra persê sey ‘roja çalakîye şima çira ewja de bî?’ ame kerdene. Ê zaf tersayêne ke ma dîmen antene. Çimkî înan nêwaştêne ke wa raştîyî bivejyî werte. Ma şagirtê Mûsa Anterî yî û ma do hertim hewl bidî raştî û heqîqetan biresnî şarî.”
AMED