Pilûr de seweta wedarnayişê barîqatê ke badê çalekîyê verra lojmananê edlîye virazîya ronîyayî çalekîyê protestoyî virazîya. Polîsê ke waştî nûmayiş provoke bikero raştê nêrazîbîyenê welatijan amey. Qezaya Dersim Pilûr de 13ê Hezîran de dûştê lojmananê edlîye bi wesayîta bombebarkerdî nûmayişek virazîya. Badê na nûmayiş dekewtişê pêrokîn taxanê qeza de hetê lejkeran barîqatî ronîyay. Bi hezaran Dersimijê ke vejyay meydanan dûştê barîqatan nêrazîbîyen damûsnay.
Parlementerê HDP yê sûk Alîcan Onlu, îdarekarê HDP û DBP yê sûk û qezayan ra pîya bi hezaran welatijî tewrê nûmayîşa protestoyî bî.
‘Dersim faşîzm rê beno mezel’
Bi hezanan welatijê ke ver şaredarîya qeza de amey têlewe bi panqarta “Dest me de xoza, cayanê cuye î îradeyê mi” heta ver Mektebê Berzîn yê Pîşeyî 3 kîlometre ray şî. Şîyayîş de sloganê zey ‘Dersim do faşîzm rê bibo mezel”, “Zextî nêşkenê ma bişikînê û “Kuçeyî yê ma yê û iyê dê ma bê” berz bî.
Azayê Meclîsê sûk yê DBP Zeynel Ornekî damûstayîn da û hayr ant zextanê cayanê cuye rojane ser. Ornekî aşkere kerd ke nê zextî nînê qebûlkerdene û bi nê vatenan waşt ke barîqatî wedarîyê: “Ceddeyê navendî yê qeza bi blokanê betonî û kuçeyê heremê Konutlar de zî bi qûmî ameyê giroten. Ganî desinde barîqatî wedarîyê û rayirî bîrê rakerdene. Zewbîn zey şar ma bi xo rayîrî trafikî ra kenê ra.”
‘Ma ra bîatkerdişî wazenê’
Peycoy parlementer Alîcan Onlu qisey kerd û hayr ant xoverdayîşê şarî ser. Onlu ard ser zon ke tewiro ke şarî bi na nûmayiş vet werte derbeyê Seray ra cewabekê tewr gird o. Alîcan Onlu vist vîrî ke derbeya Seray xo ra wazena nayî bikero û qiseyanê xo nîya ramite: “Wazenê îradeyê ma bişikînê. Ser ma de bîat, teslîmbîyayîş ferz kenê. Tewiro ke şima ewro tîya de damûsna bîatkerdiş nê, polîtîkayanê bîatî rê peyser gam eştiş o.”
Parlementerê HDP yê sûk Alîcan Onlu aşkere kerd ke gune dûştê derbe tewir û xoverdayiş pêrokîn Dersim û qezayanê ci de vila bibo. Onlu va çike barîqat û xendekî her ca de kerdê ra û qiseyê xo nîya domna: “Jû serr û nîm o ke koyanê ma, şehîtgehanê ma, cemxaneyanê ma veşnenê û rijnenê. Jûbîyena quwetê şoreşger yê ma do nînan rê peyser gam bido eştiş. Xoverdayişo ke şima ewro damûsna û peyser gam dayena eştiş ma pêrokînan rê bi wesîle. Neyra tepya wezîfeyê ma no wo ke leyê tekoşîn de ca girotiş o.”
Polîsê provokator peyser eştî
Badê qiseyan parlementer Onlu zey sembolîk huwe girot destê xo û barîqata sifte ser cadde ra wedarna û bi wesayît vêrîya ra. Wextê vilabîyenê şêligî de seweta provoke kerdenê şarî polîsî bi wesayîtanê zirxî amey cayê nûmayiş. Badê nêrazîbîyenê şarî polîsan peyser gam eşt û bî vila. Dima şêligî onca bi slogananê “Dûştê faşîzmî doş bi doş” heta zerreyê qeza ray şî.
6ê Tîrmeh de zî Platformê Demokrasî yê Pilûr bi nûmayişekê protestoyî hayr ant barîqatan ser û waşt ke barîqatî wedarîyê.
DÎHA/DERSIM