Amed de par 5ê Hezîran de mîtîngê weçînayişê 7ê Hezîranî de, bi fermanê AKP çeteyanê DAIŞ komkişten viraştibî. Serraçarnayişê na komkişten de fina Meydanê Îstasyonî de, çarçoveyê nûmayişanê vera darbeya faşîst ê AKP de, mîtîngê dûştê derbe xoverdayişê demokratîk virazîyeno. Hevserokê KCD, HDP, DBP, vatoxê HDK, parlementerê HDP û şaredarê DBP zî dê tewrê mîtîngî bibê.Komîteyê Hadreyin ê mîtîngî kombiyayişê çapemenî viraştbi. Vatoxê komîteyî Abbas Ercan’î vengê tewrbiyayişê mîtîngî da heme ronişteyanê Amedî. Hemserokê DBP ê Amed’î Abdûllah Eflatûn zî vat, vera derbeya AKP gerek herkes tewrê mîtîngê 5ê Hezîranî bibê. Kongreyê Ceniyanê Azad KJA zî, damûstayinekê dabî û pêrokîn cenîyan ra wastbî ke tewrê mîtîngê 5ê Hezîranî bibê.
Heto bîn ra welatijê ke par teqînayişê mitîngê HDP de bî dirbetin û hewna zî yenê dermankerden zî tewrê mitîngî benê. Welatijan aşkere kerdî ke sebeno wa bibo êdê mitîngê 5ê Hezîran de hadre bê.
Şarî Kadikoy de yenê pêhet
Vera derbeya AKP 5ê Hezîran de jew mitîngo bîn zî bi tewrbiyîna Hemserokê HDP Selahattîn Demîrtaşî Stenbol de virazîyeno. HDP, DBP, HDK, KCD û KJA veng day şarî ke serva ke derbe rê vajê nê Meydanê Bakirkoy tî bikerê.
Derheqê hadreyînê mitîngî de îdarekaranê HDP, HDP, KJA, KCD û DBP bana HDP yê sûk de kombiyayişê çapemenî viraştî. Hemserokê HDP yê sûk Dogan Erbaş’î kombiyayiş de qisey kerd û dûştê polîtîkayanê herbî Stenbolijan silayînê mitîngî kerd. Parlamentera HDP yê Stenbol Huda Kaya zî hayr ant operasyonanê qirkerden û wedarnayişê heqê destnêdayişê HDP ser û wina va: Îradeyê 6-7 mîlyonan nîno qebûl kerden. Yê ke vanê sindoq sindoq ewro sindoqan çinî hesibnenê.” Kaya zî ronişteyanê Stenbol ra waşt ke meydanî zey 7ê Hezîranî tî bikerê.
Qiseykerdoxê HDK yê Stenbol Şamîl Altan, Hemseroka HDP yê Stenbol Aysel Guzel û azayê komîteyê hadreyîn yê mîtîngî Felemez Erkan’î qisey kerdî û day zonayen ke mitîng dûştê faşîzm, derbe û zihnîyetê înkarî virazîyeno. Kiseykerdoxan cenî, genc û pêrokîn welatijan ra waştî ke wayrê mitîngî bivejyê.
DÎHA/AMED/STENBOL