Perwerde şaxê DÎKASUMe yê Ben û Senî de dest pê kerd û perwerde serê siba û nêmrojî ra tepîya ame dayîş. Dayîkanê domanê ke bin banê Zarokîstanan de wanenê beşdarê perwerdeyî bîyî. Perwerde hetê pispora Xizmetî yê Serekîya Dayîreyê Polîtîkayanê Cenîyan Nihal Bozhan Ozbek, komelnas Gunay Yakut û Keyeyê Solîne yê kayî yê Şaredarîya Rezanî Aynur Ozbaye ra ame dayîş.
Armanc xo pawitiş o
Pispora Xizmetî yê Serekîya Dayîreyê Polîtîkayanê Cenîyan Nihal Bozhan Ozbek sere de derheqê muhtewaya perwerdeyî de zanayîş da. Ozbeke îzah kerd ke bi no perwerde kenê ke domanan verba îstîsmar û îxmalan bipawe û wina vat: “Ma wazenî nê meseleyan ser o zanayîş bidê cenîyanê xo. Domanan de naskerdişê wucitî û taybetîya wucitî ser o zanayîş yeno dayîş. Ancî ‘gelo ma eşkenê wucidê xo de cayanê taybetan senî eşkenê bipawê’ ser o perwerde dîyayo domanan.”Ozbeke îzah kerd ke demo peyên de hedîseyê îstîsmarbîyayîşê domanan zêde bîyo û wina vat: “Tewr peynî hedîseyêka îstismarî şaristanê ma de qewimîya. Domanî ke şonê dibistana seretayî ya yewine raştê îstîsmarê ameyî. Ma zî naye ser o perwedeyanê hayîbîyayîşî danê. Ma hem perwerde danê cenîyan hem zî danê domanan. Tenya îstîsmarbîyayîş ser o nê îxmalbîyayîşê domanan ser o zî perwerde yeno dayîş.”
Ozbeke da zanayîş ke Zarokistananê bînan de zî winasî perwerdeyî do bêrê dayîş û wina dewam kerd: “Gama ke ma mîyanê şaristanî de perwerde qedîna, ma do teberê şaristanî de zî winasî perwerdeyan bidî. Ma Hêni û Licê ra dest pê kenî. Eke waştişî bibê ma waştişan ser o zî perwerdeyan danî.
DÎHA/AMED