Hemsereka KNKyî Nîlufer Koçe derheqê qetilbîyayîşê Endamê Koordînasyonê Êzidîyan Zekî Şengalîyî de qisey kerde û melumatê muhîmî pare kerdî. Koçe va ‘rolê xeylê hêzan nê qetlîyamî de esto’ û wina domnaye: “Ganî ma wayîrê Zekî Şengalîyî bivejyî. Ez herkesî dawetê awankerdişê Êzidxanê Xoser û Kurdistano Azade kena.”

Endamê Koordînasyonê Êzidîyan Zekî Şengalî hetê teyarayanê dewleta tirkî ra ame qetil kerdene. Her ke şono vera nê qetlîyamî de reaksîyonî zêde benî. Babete ser o Hemsereka Kongreya Neteweyîya Kurdistanî (KNK) Nîlufer Koçe qisey kerde û melumatê muhîmî pare kerdî.

Koçe va ‘Zekî Şengalî 2014 de badê ke DAIŞî hêrişê Şengalî kerd, şi Şengal û ewja de rêxistinîya êzidîyan de rolêko gird kay kerd’ û wina domna: “Şengalî netîceyê hemkarîya dewleta tirk û hêzê herême de ame qetil kerdene. Seba ke rêxistinîya êzidîyan de keda Şengalîyî zaf bîye, bi hawayo qestî ame hedef girewtene.”

Koçe dewamê qiseykerdişê xo de wina va: “Ez şexsê Zekî Şengalîyî de heme şehîdanê şorişî bi rêzdarî vîr ana. Ma do bi têkoşînê xo bibî layîqê şehîdan. Şengalî 4 serranê peyênan de seba Êzidxanêko demokratîke kede da. Dinya vera fermanê 73. de çîyêk nêkerde, labelê hêzê PKKyî destûr nêda fermanî. Nê hêzan bi qetilkerdişê Şengalîyî hewl dayî heyfê binkewtişê hêrişê 3ê tebaxe bigîrî.”

Heta îzehet nêdo, Îraq zî şîrik o

Koçe bale ante berpirsîyarîya tayê hêzan ser û wina va: “Êzidxan berpirsîyarîya dewleta Îraqî de yo. Rejîmê Sedamî ra dima Îraq berpirsîyarîya Amerîka de yo. Cok ra nê her di hêzî qetlîyam ra berpirsîyar î. Hukmatê Îraqî hetêk ra Îran reyde, hetêk ra zî Tirkîya reyde hereket keno û bi no hawa hewl dano emrê xo derg bikero. Reyna bi seserran o ke problemê Mûsilî esto û hîna çareser nêbîyo. Dewleta tirkî hertim ewja sey erdê kalikanê xo vînaye. Selahîyetdaranê Îraqî tesîrê Şengalîyî baş zanayêne û waştî îdareyê xoserî yê demokratîke bişiknî. Ebadîyî heta nika nê hêrişî şermizar nêkerd.”

Tena hêzê PKKyî xover danî

Koçe qiseykerdişê xo de qala rolê PDKyî zî kerde û wina va: “Referandûmê Başûrê Kurdistanî ra dima sîyasetê Başûrî de problemê cîddî yenî cuyayene. Dewleta tirkî ke Sûrîye de îflas kerde, nika hewl dana Başûr de hilme bigîra. Verê cû 24 qerargehê dewleta tirkî Başûr de estbî, nika bîyî 35. Dewleta tirkî wazena rewşêka sey 92î awan bikero. Dewleta tirkî hewl dana rewşa ke lehê kurdan de ya, bêtesîr bikera û kurdan vera yewbînan de bida şer kerdene. Dewleta tirkî bi nê qetlîyamî nîşan daye ke aye do nika ra pey giranî bido dagîrkerîya Başûrî. Vera na dagîrkerîye de tena hêzê PKKyî xover danî.”

Ganî dûştê neteweyî de wayîr bivejyî

Koçe peynîya qiseykerdişê xo de va ‘tîya de çîyo ke bêro kerdene o yo ke ganî dûştê yewîya neteweyî de wayîrê Zekî Şengalîyî bêro vejîyayene’ û wina qedêna: “Zekî Şengalî Kongreya Neteweyî ke serra 2013î de Hewlêr de ameye viraştene de nizdîyê 4 aşmî ser nameyê PKKyî ca girewt. Cok ra ganî heme temsîlkarê ke maseya kongre de ca girewtî, vera qetlîyamî de têkoşîn bidî. Ez herkesî dawetê nîşandayîşê reaksîyonî û awankerdişê Êzidxanê Xoser û Kurdistano Azade kena.”

 

ANHA / QAMIŞLO