Fermandarîya Qerargehê Merkezê Pawitişî yê Şarî (MPŞ), bi wesîleya çalakîya hemverê Qereqolê Bêzokê, mesajêkê pîrozkerdişî Fermandarîya Eyaletê Avaşînî rê şirawit.
MPŞyî mesajê xo de vato ‘Çalakîya ke hêzanê şima yê eyaletî çarçewaya Hemleya Şorişgêre ya Şehîd Bager-Şehîde Ronya de vera asayîşê Qereqolê Bêzokê de viraşta, çalakîyêka serkewtî û netîcegirewtox a’ û wina domnayo: “Na çalakîye çarçewaya perspektîfê newe ra awanbîyayîşî de goreyê metodê çalakîye, çalakîyêka serewextê newî ya. Ma heme hemrayanê ke tewrê çalakîye bîyê û fermandarîya şima zerrî ra pîroz kenê.”
MPŞyî dewamê mesajê xo de wina vato: “Plankerdiş û bicaardişê çalakîye bi cesaret û afernayoxîyêka xurte dir bîyî yew û bi nê hawayî netîce girewt. Na çalakîya operasyonîye ya şorişgêre de ke mîyanê roje de virazîyaye, bê ke vînîbîyayîşêk virazîyo şîyê serê cenazeyanê dişmenî, 5 sîlehê ferdî yê G3yî û sîlehêkê BKCî, bi pêroyî 6 sîlehî û malzemeyê nê sîlehan ameyê destsernayene. Bi leze û tempoyêkê berzî mîyanê 5 deqeyan de bê ke vînîbîyayîş yan zî birandarî virazîyê, meterîsê dişmenî ameyê rijnayene. No performans ramojneno ke gama ruhê fedaî yê Apoyîyî afernayoxîya taktîkîye dir bireso pê do netîceyêko senî bigêro.”
Artêşe halê xo yê zurekerî ramot
MPŞyî mesajê xo de qala tengbîyayîşê dewleta tirkî kerd û wina vato: “Wezaretê Pawitişî yê Milî yê Tirkî sey her reye, seba ke tengizîyayîşê xo yê hemverê çalakîye binimno û metodê rijnayîşî û ruhê hêrişî yê berzî yê gerîlayî hetê cimatî ra nêro dîyayene, bi vatişê ‘Netîceyê hêrişê hewanî de yo ke Vakurê Iraqî de ameyo kerdene, vînîbîyayîşî virazîyayê’ reyna halê xo yê zurekerî ramot. Labelê ê se kenê wa bikerê do nêeşkê hemverê atmosferê şorişgêrî yo ke bi pirodayîşê biheybetî yê gerîlayî vejîyayo werte binimnê, do nêeşkê emrê îqtîdarê xo ye faşîstî derg bikerê. Ma hemrayanê Apoyîyan ê fedaîyan ê ke tewrê na çalakîye bîyê û çalakîye bi hawayêkê afernayoxî viraştê reyna pîroz kenê, bihîsanê şorişgêran ê zerrî ra ma şima hemînan rê serkewtiş wazenê.”
ANF / BEHDÎNAN