Serokomarê Tirkîya Tayyîp Erdogan Hemserokê Pêroyî yê HDP Selahattîn Demîrtaşî zey "terorîst" hedef damûsnabi. Nê nêqaretan rê cewab weçîntoxanê HDP ra ame. Amedijê ke vatişanê Erdoganî rê reaksîyon damûsnay, aşkere kerdî ke kesêko 6 mîlyon rey girotîyo “terorîst” nîyo, kesê ke Cizîr de domanan qetilkerdî terorîst ê.
Serokomarê Tirkîya Erdogano ke 8ê Temmuze de, Zîrweyê G20î ra dima sûka Almanya Hambhurg de qisey kerd, Hemserokê Pêroyî yê HDP Selahattîn Demîrtaşî û wekîlanê tepişteyî yê HDP zey "terorîst" hedef damûsna.
Erdoganî qiseyanê xo di vatibi “Serbest veradayîşê terorîstê ke girotxane de yê, destê ma de nîyo. Tirkîya dewletêka hiqûqî ya. Ê kesê ke şima behs kenê terorîst ê”. Nê vatenanê Erdoganî ra him kişta partîyanê sîyasî û him zî kişta weçîntoxanê ke rey daybî HDP nêrazîbîyayîşî ramenê. Şarê Amedî zî nê vatişan rê nêrazîbîyayîşî damûsnay.
‘Demîrtaş kesayetêko taybet o’
Welatijê bi nameyê Firat Avci dîyar kerd ke Demîrtaş siyasetmedarêko muhîm o û vist vîrî ke wextê Kobanê de Demîrtaşî vengnêdîyaba zî, xo ra şar bi xo vejya kuçeyan. Avci aşkere kerd ke Demîrtaş pêşengêko muhîm o û va, ‘Bahçelî û Erdoganî ra başêr sîyaset keno. Wa Erdogan ageyro finê biewnîyo xo.”
Tarik Narînî zî vist vîrî ke seba yew serokê partîyêka sîyasî telafûzkerdişê çêkûya "terorîst" şaşîyêka gird a. Narîn da zanayîş ke kesêko 6 mîlyon veng giroto, terorîst nîyo û wina va: “Tepiştişê Demîrtaşî û pêro wekîlan bîle şaş o. Çîyê ko bibo sebebê tepiştişê înan çin o.”
Wa kiştoxî bierzîyê girotxaneyan
Welatijan ra Nedîm Menteşî zî ard ser ziwan ke şar vatişê "terorîst" ê Erdoganî nêgêna cidî û qiseyanê xo wina domna: “Wexto ke vanê Demîrtaş şar yeno vîrê ma. O pêşengo ke mîyanê şarî ra vejyayo, bi şaranê kurd, laz, çerkez û ermenî ra bîyo yewe.”
Îbrahîn Akinî zî hayr ant qetilkerdişê sivîlan ser û aşkere kerd ke kesê ke Cizîr de domanan qetil kerdî terorîst ê. Akinî vatenanê Erdoganî protesto kerd û va, Demîrtaşî kesî qetil nêkerd, kesê ke însanan qetil kerdî wa bierzîyê girotxaneyan.”
Vatişê Erdoganî "bêhurmetî” yê
Cinîya bi nameyê Rojda Bay zî vatişanê Erdoganî zey "bêhurmetî” dî û wina va: "Terorîst kamî rê yeno vatiş ma rind zanê. Ez winî bawer kena ke Erdogan fikrê Demîrtaşî nêzanê. Ya zî zano la kêrê ci nîno. Demîrtaş êşkeno haştî bîyaro welat. Sîyasetmedarêke wayîrê fikranê xeylê baş o.”
AMED