Hepsîyanê çalakwanan ra Zekî Bayhanî derheqê prosesê grevê vêşanîye ra dima kerd û wina va: “Nika ra pey ê ke do têkoşîn bido, do qezenç bikero. Êdî sîstemo ke esto reyde nêbeno. Problemî bi metodanê verênan çareser nêbenî. Ganî sîstem û metodê neweyî bêrî xelqkerdene.”
RONÎ ARAM / ANF / STENBOL
Vera tecrîdê serê Rayberê Şarê Kurdî Abdullah Ocalanî de sere de hepsîyî û xeylê kesê bînî çalakîyê grevê vêşanîye de mendî û aşma peyêne hepsîyan ra tayê ci çalakîya xo açarnaye rojeyê mergî. Çalakîya grevê vêşanîye ke nizdîyê 7 aşman dewam kerde, hetê xeylê hepsîyan ra sey prosesê perwerdeyî yena dîyayene.
Nê hepsîyan ra yew zî Zekî Bayhano ke Zîndanê Tekîrdagî de maneno û o zî rojeyê mergî de mend. Bayhanî derheqê tecrîdî de va ‘tecrîd problemê zîndanêkî nîyo, yê rejîmî yo’ û wina domna: “Ma heta nika qet sey problemê zîndanî nêdî. Tecrîd Îmrali ra pêl bi pêl vilayê heme wareyanê komelî beno. Xoverdayîşê ma vera nêyî de bi. Tecrîdbîyayîşê Rayberîye, yeno manaya tecrîdbîyayîşê muxalefetî.”
Bayhanî dewamê qiseykerdişê xo de va ‘tayê ci raşteraşt destek da û wayîrê çalakîye vejîya, tayê ci zî sewbîna hewa cayê xo tede girewt’ û wina dewam kerd: “Ganî ma heme destekan bivînî. Ma baş zanî ke 2 pêvînayîşan reyde tecrîd nêwedarîyeno. Xoverdayîşê ma tecrîd bêmana kerd û cok ra ma kêfweş î. Ma sipasîyê xo seba dayîkanê ke kuçeyan de xover da rê kenî. No têkoşînêk o, gamêk erzîye û têkoşîn dewam keno.”
Ma do nika ra pey zî têkoşîn bidî
Bayhanî bale ante proseso ke nika ra pey dest pêbikero ser û wina va: “No ancax şert û mercê Tirkîya ra û pratîkê hêzê ke têkoşîn danî ra yeno famkerdene. Ê ke têkoşîn bido do qezenç bikero. Ma zî do bi heme dezgehanê xo têkoşîn bidî. Ewro dinya prosesê derbazbîyayîşî de ya. Êdî sîstemo ke esto reyde nêbeno. Problemî bi metodanê verênan çareser nêbenî. Ganî sîstem û metodê neweyî bêrî xelqkerdene. Prosesê ewroyîn de tena rîskî nê, tayê avantajî zî estî. Ewro lazimîya herême û Tirkîya tewr zaf bi sîstemêko sosyalîst esta. Perspektîfo ke hetê Rayberîya ma ra ameyo pêşnîyazkerdene, tena seba şaranê Tirkîya nê, seba şaranê herême rayîrê çareserîye yo. Ma heta nika seba nêyî têkoşîn da, ma do nika ra pey zî na çarçewa de têkoşîn bidî.”
Ma heme zaf kêfweş î
Bayhanî qiseykerdişê xo de qala tedawîbîyayîşê çalakwanan kerde û wina va: “Hetê pêroyî de rojêk dima ra tehlîlê gonî û îdrarî ameyî kerdene. Reyna netîceyê tehlîlê qelbê çalakwanan ra ame ewnîyayene û nê melumatî erşawîyayî nêweşxaneyan. Heta nika çîyêk ma ra nêameyo vatene. Yeno vatene ke goreyê netîceyê nê tehlîlan do çalakwanî sewqê nêweşxaneyan bêrî kerdene. Eke merdimê ke bi aşman grevê vêşanîye de mendî, yenî derbkerdene, na ecizîya derbkaran a. Nêyî benî sebeb ke ma do xoverdayîşê xo girdêr bikerî. Ma baş zanî ke grevê vêşanîye ke demêko derg dewam kenî, weşîya merdimî ser o xeylê tesîran virazenî. Labelê no seba ma zaf muhîm nîyo. Ez zî û heme embazê bînî zî seba ke xoverdayîşê ma resa serkewtişî û vengê Rayberîye ame eşnawitene, zaf kêfweş î.”