Peyniyê 2 hêrişanê bombeyin de, vêşiyê 100 aştîwazî şehîd kewtî û bi seyan zî bî dirbetinî. Ena komkiştenî rojo ke, KCKe qerarê bê çalakiyan eşkere kerd viraziyê. Bi taybetî mîtîngê aştî û rojê eşkerekerdinê bê çalakiyini weçînaye yo.
***
Enqere ra cenazeyê rêşiyay zaf sûkanê Kurdistan û Tirkîyaye. Eno bîle bi serê xo, hedefê hêrişî, kiştox û mesûlanê ci rafîneno çiman ver. Hedef birayinê şaran o. Hedef wertaxîna kurdan û quwetanê demokratîk ê Tirkîyaye yo. Fina siftayin o quwetê çep, sosyalîst û demokratîkî binê jew banî de yenê pê het. Hetanî nika xeylê finan, çiyê winayin ceribiya. La belê her tim dewlet kewtê maben û wertaxîna kurdan û quwetanê demokratîk xeripinayê. Bi projeyê HDPe, kurdan ra bigirê hetanî çoşmeyê çep, sosyalîst, elewî, dîndarê rastîn û çoşmeyê demokratî jew ca amey pê het.
***
Ena jûwîni, weçînayinê 7’ê hezîrane de, binkewtinê Erdogan-AKPe xoya piya ard. Cesaret da quwetanê demokratîkî. Îhtimalê qewirnayinê Erdogan-AKPe veti werte. Tersê gird vist zeriya Erdogan-AKPe. Coka Erdogan û AKP zey xîntan û harran dest bi hêrişan kerd. Coka komkiştena Pirsûsî viraşt. Wast mabenê kurdan û quwetanê demokratîkî biakero. Wast quwetanê demokratîk kurdan ra dûrî bifîno. Labelê planê ci nêtepişt. Quwetanê demokratîkî wertaxîna bi kurdan kerd vêşî. Tokat ra hetanî Nîgde, wija ra hetanî Tekîrdag destegê qandê HDPe bi vêşî.
***
Çiyê winayin zî arefeyê weçînayinê 1’ê Teşrîne de, tersê Erdogan-AKPe kerd vêşî. Coka komkiştena 5’ê hezîrane yê Amedî û 20’ê temmuze yê Pirsûsî ra ders veti. 10’ê citmenge de komkiştena tewr gird ê tarîxê Tirkîyaye de viraşt. Enqere ra cenazey rîştî xeylê hetanê Tirkîya û Kurdistanî. Wasten temamkerdinê komkiştena Amed û Pirsûs bî. Wast şaran vejê verniyê pêjewîn û wertaxîn û hetkarînê kurdan û quwetanê demokratîkî bixeripinê. Quwetanê demokratîkî kurdan ra dûrî bifînê. Labelê saniyeyê siftayin ra tepiya, bê AKPijan her kesî komkişten ra Erdogan û AKP mesûl girot û genê.
***
Xora vaten û kerdenê Erdoganî ra hetanî Davutoglu, yê wezîran ra hetanî burokratan, heme rolê dewlet ê komkişteni de rafînenê çiman ver. Erdogan û AKP zî vînenê şaro înan komkişten ra mesûl genê. Coka kewtê miyanê têgêrayîşî û wazenê rolê xo binimnaynê û verniyê munaqeşeyan bigirê. Coka Davutoglu û AKP heme îmkanê xo seferber kerdê. Coka qirkerdinê siyasî kerdî vêşî. Coka qerarê zey dosyayanê sûcê dewletî yê bînî, qerarê miyanîkîn û sansorî da veteni. Coka qandê verniyê nêrazîbiyayinan bigiro, zey Roboskî wazena pereyan bido merdimê merdeyanî. Coka butçeya saziyê komkişten MÎT û butçeya saziyanê lejî kena vêşî. Aya hetanî 1’ê Teşrîne zî bikiro. La belê 1’ê Teşrîn de dersa gird a bidiyo AKP û demê hesab-dayinê qandê AKP dest bikiro. Ê rojan rê bol nê, teniya 2 hefte mend.
Memed DREWŞ