Birayê Rayberê Şarê Kurdî Abdullah Ocalanî Mehmet Ocalanî vera tecrîdî de reaksîyon nîşan da û wina va: “Ê se kenî wa bikerî, şarê Rojhelatê Mîyanênî Rayberîya xo reyde bîyî yew. Senî ke 9ê teşrîna verêne û Komploya Mîyanneteweyî veng ameyî vetene, do polîtîkaya tecrîdî zî veng bivejîya.”

 

ERDOGAN ALAYUMAT / MA / RIHA

Rayberê Şarê Kurdî Abdullah Ocalan 9ê teşrîna verêne de Sûrîye ra amebi vetene û emser serrgêra 20. ya vejîyayîşê ey o. Ocalano ke 15ê sibata 1999î ra nata Girawa Îmrali de binê tecrîdêko giran de yo, 27ê temmuza 2011î ra nata nêşêno avûkatanê xo reyde, 11 êlula 2016î ra nata zî nêşêno keyeyê xo reyde pêvînayîş bikero.

Birayê Ocalanî Mehmet Ocalanî derheqê tecrîdî de qisey kerd û dîyar kerd ke tecrîd dewamê komploya 9ê teşrîna verêne yo. Ocalanî va ‘badê ke Ocalan Sûrîye ra ame vetene, heme dinya berê xo ey rê padayî’ û wina domna: “No sere de seba Ewropa, dima ra seba heme dinya, şerm o. Heme welatê Ewropa ke 100 serrî verê dişmenê yewbînan bî, seba ke kurdî bi hawayo esîr bicuyî, pê kerdî. Komploya 9ê teşrîna verêne de zî piştîdayîşyewbînanê nê dewletan dibare kerd. Yeno waştene ke şexsê Ocalanî de kurdan çinî bikerî.”

Ocalanî va ‘seba Sûrîye ra vetişê Birêz Ocalanî Amerîka û Ewropa bazarîyê lêminî kerdî’ û wina domna. “Xeylê dewletê ke soz daybî, bi aşman tena mijûl kerdî. Ma proseso ke qet dinya de nimuneya ci çinêbî, cuyayî. Tarîx de ti rayberêk muameleyêko winasî reyde têrî nêmendo. Ewropaye qanûnanê xo girewto binê lingan û komployêka winasî viraşta.”

 

Ewropa Tirkîya ra cîyayêr nîya

Ocalanî va ‘tarîtîya serranê 90î de averşîyayîşê cîddî bîyênê’ û wina dewam kerd: “Xeylê cayanê dinya ra merdiman vera xo dabî Ewropa. Ewropaya ke îdîa kerdêne ke aye her kesî rê berê xo akerdî, Rayberê Şarê Kurdî rê cayêk nêdî. No seba Ewropa çîyêko şerm û giran o. Ewropaya ke hertim bi demokrasîya xo pesnê xo dayêne, ame fam kerdene ke raştîya xo de ti cîyayîya aye Tirkîya ra çin o.”

 

Qerarê MHME dewamê komplo yo

Ocalanî bale ant qerarê Mehkemeya Heqê Merdiman ya Ewropa (MHME) ser û wina va: “MHMEye bi qerarê xo nîşan daye ke komplo hîna dewam keno. Eynî wextî de MHMEye nîşan daye ke huqûq dinya de kamcîn dûştî de yo. Huqûqê MHME û CPTyî Îmrali de derbazdar nîyo. Qerarê MHME huqûqî nîyo, sîyasî yo. 3 serrî yo pêvînayîşî nêbenî. Çira MHME nêwazena ke bivîno?”

Wa demokratî vera tecrîdî de bivinderî

Ocalanî peynîya qiseykerdişê xo de va ‘keso ke hetê mîlyonan ra sey îrade yeno hesibnayene, raştê tecrîdo ke nimuneya ci ti cayê dinya de çin o yeno’ û wina qedêna: “Na polîtîka dewamê komploya 9ê teşrîna verêne ya. Labelê ê se kenî wa bikerî, şarê Rojhelatê Mîyanênî Rayberîya xo reyde bîyî yew. Senî ke komploya 9ê teşrîna verêne veng ameye vetene, do tecrîd zî veng bêro vetene. 3 serrî yo ke Ocalan ra ti xebere nîna girewtene û no zî bîyo sebebê etirîyayîşêkê girdî. Ez veng dana herkesî ke wa vera tecrîdî de bivinderî. Rayber Apo wazeno ke wa Rojhelato Mîyanên de aştîye biba. Ganî bi hawayo lez tecrîd wedarîyo. Problemê kurd û yê Rojhaletê Mîyanênî ancax bi azadîya Rayberîye çareser benî.”