15ê Temmuze teşebusê derbe ra dima OHAL ame îlankerdiş û dima ra hema vaje heme şaredarîyanê DBPyî rê qayûmî ameyî tayînkerdiş. Kerdişanê nê qayûman ra yewe zî tabelayê ke hetê şaredarîyanê DBPyî dîyaybî şaredarîye, parke û sewbîna dezgeyan ro, yewe bi yewe ardîyayî war. Nê qayûman ra yewe zî qayûmo ke tayînê Şaredarîya Licê bîyo yo.
Îcraatanê qayûmo ke tayînê Şaredarîya Licê ya Amedî bîbî ra yewe zî bedilnayîşê tabelayê parkê Ceylan Onkole û Medenî Yildirimî yo. Babete ser o Avûkata doza Medenî Yildirimî Reyhan Yalçindag Baydemîre qisey kerde.
Baydemîre dîyar kerde ke qayûmî bitaybetî nameyê ke mîyanê kurdan de bîyî sembol, hedef gênî û wina dewam kerde: “Tabelayê Tahîr elçî, Mehmed Uzun, Ehmedê Xanî ra dima nika zî tabelayê Ceylan Onkole û Medenî Yildirimî ameyî bedilnayîş. Medenî Yildirim wextê prosesê aştîye de seba ke vera viraştişê qaleqolan de vindetêne, hetê dewlete ra ame qetilkerdiş. Herinda ke bi mîlyonan reyan keyeyî ra ozrê xo biwazî, dest ronenî vîrardişanê nê domanan ser de.”
Dejê merdiman zêdeyenî
Baydemîre va ‘Medenî Yildirim û Ceylan Onkole ra dima bi seyan domanî ameyî vînîkerdiş’ û wina domna: “Biagêrê, biewnênê, Medenî Yildirim û Ceylan Onkole ra dima bi seyan domanê ma merdî. Sey ke şaîre Ece Ayhane zî vana ma domananê xo ‘dersê dewlete de’ vînî kerd. Ez bi telefonî dayîka Medenî Yildirimî Fahrîye Yildirime gêraya. Dayîka Medenîyî zî eynî çîyan vana. Dayîke vatêne ‘nameyê Medenîyî hetê qayûmî ra ame bedilnayîş’. Nê merdimî yewna rey hetê qayûman ra yenî mexdurkerdiş.”
Hedef bêhiş verdayîş o
Baydemîre peynîya qiseykerdişê xo de va ‘sebebo esasî bêhiş verdayîşê komelî yo’ û qiseykerdişê xo wina qedênaye: “Wexto ke komel bêhiş yeno verdayîş, eynî wext de ameyoxa komelî zî beno hedef. Çimkî bêhişî beno sebeb ke kerdoxan ra hesab nêro perskerdiş. Xora wexto ke komel bêhiş mend, ewja de merg zî dest pêkeno. Gelo ma do hertim pey kerdoxan de vazdî, yan zî do komel do nê bêhişîye xovîra bikero. Na saete ra pey wazenî wa heme parkan ra nameyanê sembolan bîyarî war, ê se bikerî zî nêşenî nê nameyan zerrîya neslo newe ra pak bikerî.”
JINNEWS/AMED