Mehkemeya Cezayê Giran ê Amedî derheqê polîsanê kiştoxê Enes Ata yê 8 serrî ke serra 2006î de Amed de netîceyê gulerijnayişê polîsan de ame qetilkerdiş, waştena beraatî kerd. Pîye Enes Ata, Selamattîn Atayî ard ziwan ke no 10 serrîyo ke cîgera ey veşena û va: “Edaleta ke 10 serran dima ra bîro ez o a edaletî se bikera?”
Amed de 28ê Adara 2006î de, netîceyê hêrişanê polîsan de domanê bi nameyê Enes Ata yê 8 serrî û Mahsûn Mizrak ê 14 serrî amey kişten. Mehkemeya Cezayê Giran ê Amedî ya 1. dawa akerd, la no 10 serrîyo hona zî kiştoxê Enes û Mahsunî nêamey cezakerdiş. Rexmê qerarê AÎHM ke Tirkîye sucdar dî zî, 33. roniştişê dawa de, beraatê 3 polîsanê kiştox amê waşten.
Polîsî bi xo zî înkar nêkenê
Pîye Enes Ata, Selamattîn Atayî waştena beraatê polîsan rê nêrazîbîyayiş damûsna û wina va: “Her çî werte de yo. Ti omid û emelê mi bi hiqûqî ra nêmendo. Polîsî bi xo zî înkar nêkenê û sûcî gênê ser xo. Cilê Enesî zî amey vinîkerdiş. Na seatî ra tepya ez o çi bipawa.”
Kiştoxê Enes hona ser kar ê
Selamattîn Atayî ard ziwan ke no des serrîyo ke deja lajê xo anceno û wina dewam kerd: “Roja ke Enesê mi ame qetilkerdiş ra na het emrê mi ver mahkemeyan de ravêrd. Zana ke peynî de dê bîrê beraatkerdiş. La heta peynî ez o tekoşîna edaletî biramna. Rastî de edaleta des serran dima veng (tol) a. Kiştoxê Enes ke bi bacê mi pere gênê hona ser kar ê. Çend rojan ra tepya dê teqawit bibê. La ez o heta peynî pey înan ba.”
Ata vist vîrî ke eke kiştoxê lajê ey nîrê cezakerdiş, dê qetilkerdişê domanan dewam bikero û aşkere kerd ke mahkeme waşt bi raya tezmînateke werdî babed bigîro, la înan dawaya tezmînata 250 hezar TL akerdîya.
DÎHABER / AMED