Çalakîya gervê vêşanîye ya bêdem û anêgêrayîşî ya Leyla Guvena ke seba wedarnayîşê tecrîdê serê rayberê PKKyî Abdullah Ocalanî dabî destpêkerdiş roja 139. de dewam kena. Sewbîna çalakîya 7 hezar hepsîyan ke seba eynî taleban dayî destpêkerdne zî dewam kena. Hepsîyê Zindanê Tîpa Tyî yê Odemîşî ke grevê vêşanîye yê bêdem û anêgêrayî de yî bi rayîrê keyeyanê xo dîyar kerdî ke do netîceyê çalalakîya înan seba îqtîdarî zaf giran bibo û dayî zanayene ke xoverdayîşê înan de embazê înan canê xo feda kerdî û êdî agêrayîşê çalakîya înan êdî çin o.
Hepsîyan wina vatî: “Ma wazenê ke madeya qanûnê hûmara 5275î bêro caardene. Dewlet qanûnanê xo binpay kena. Embazê ma hemverê tecrîdî de cuya xo vindî kerdî. Çalakîya fedaî ya embazanê ma nîşan daye ke heta ke xoverdayîş netîce nêgîro, do çalakî dewam bikerî. Ma zaf hîssin î, la ma xo ser de yî. Çalakîya ma do dewam bikera. Ma veng danê her kesî ke dormeyê xoverdayîşê grevê vêşanîye de bibî xelek.”
Hepsîyan bale antî îqtîdarî ke çalakîyan nêvînayîşî ra yeno ser û vatî: “Hukmat muhasebeyê rayan keno. wazeno ke rayan qezenc bikero. La do no muhasebeyê înan veng bivejîyo û netîceyê çalakîya ma do seba îqtîdarî zaf giran bibo. Xoverdayîşê ma de embazê ma canê xo feda kerdî. Êdî gonî kewt mîyanê no gure. Êdî agêrayîş çin o. Ma veng danê her kesî û şarê xo ke veng bidî xoverdayîşê ma. Ma do tecrîdî bişiknî. Ma vengê piştîdayîşê her kesî kenî.”
Hepsî Ûgûr Çîçek, Mehmet Kaplan û Serhat Guzelî 26ê Kanûna 2018î ra nata Zindanê Tîpa Tyî yê Odemîşî de grevê vêşanîye de yî. 1ê Adare de zî xeylê hepsî dest bi grevê vêşanîye yê bêdem û anêgêrayî kerdî. n ÎZMÎR