PAJK û TJK-Eye derheqê 4ê Nîsane Rojbîyayîşê Rayberê Şarê Kurdî Abdullah Ocalanî de îzehet dayî û dîyar kerdî senî ke destpêkê her şorişê komelkî esto, destpêkê cuya azade yê kurdan zî roja bîyayîşê Rayber Apoyî yo û wina dewam kerdî: “Ma bi Rayberîya xo welidîyayî, ma do bi Rayberîya xo azade bibî.” Rayberê Şarê Kurd Abdullah Ocalan 4ê Nîsana 1949î de ameyo dinya û her serre destpêkê aşma Nîsane rojbîyayîşê Rayberê Şarê Kurdî xeylê cayan de yeno pîrozkerdiş. Emser serrgêra 69. ya rojbîyayîşê Ocalanî yo. Babete ser o xeylê dezgeyan îzehetê nuştekî dayî û rojbîyayîşê Ocalanî pîroz kerdî. Koordînasyonê Partîya Azadîya Cinîyanê Kurdistanî (PAJK) îzehetêko nuştekî da. Koordînasyonî îzehetê xo de va ‘4ê Nîsane hetê têkoşînê cuya azade yê cinîyan û şarê ma de mîlad o’ û îzehet wina dewam kerdo: “Senî ke destpêkê her şorişê komelkî esto, destpêkê cuya azade ya cinî û şarê kurdî zî roja bîyayîşê Rayber Apoyî yo. 4ê Nîsane tena rojbîyayîşê Rayberîye nîyo, eynî wextî de rojbîyayîşê ma hemînan o. Erjê ke hetê Rayberîya ma ra ameyî xelqkerdiş ewro Efrîn de şexsê şarê ma de yenî dîyayîş. Azadîya Rayberîye, azadîya ma hemînan a. Ma bi Rayberîya xo welidîyayî, ma do bi Rayberîya xo azade bibî. Na çarçewa de ma sifteyîn seba Rayberîya xo û heme şar û cinîyan rê pîroz kenî û ma bi îdîaya welatêko azade Rayberîya xo silam kenî.” Tevgerê Cinîyanê Azade yê Ewropaye (TJK-E) zî da zanayîş ke Rayberê Şarê Kurd 19 serrî yo ke şert û mercê tecrîdî de xover danî û wina domnayo: “Seke no zî bes nêbo, 5ê Nîsana 2015î ra nata ti xebere tira nîna girewtiş. Mîyanê nê demî de tena yew rey demêko kilm birayê ci dî. Pêvînayîşê avûkatî zî 27ê Temmuza 2011î ra nata yeno astengkerdiş. Yê ke ewro Îmrali de yeno tecrîdkerdiş, îradeya aştîye ya. CPTyo ke 2 serrî verê Îmrali de cigêrayîşî kerdbî, wextê dagîrkerîya Efrînî de raporê xo aşkere kerd. No zî merdim dano fikirîyayîş. Dima ra ma musayî ke heyeto ke tede tirk û rusî estî, şîyo Îmrali û waştî Ocalanî ser o zextan bikerî, la seba ke Ocalanî qebul nêkerdo, zextî ameyî zêdekerdiş. Seba ke CPT berpirsîyarîya xo bîyaro ca, ma do 4ê Nîsane de heme cayanê Ewropa de çalakîyanê rayîrşîyayîşan organîze bikerî. Wa bi hawayo lez CPT şêro Îmrali û derheqê weşîya Ocalanî de melumat bidîyo raya pêroyî. Wa dewleta tirkî fek zextanê fîzîkî û psîkolojîk ra verabido. Reyna wa dewletê Ewropaye vernîya şero ke Kurdistan de esto, bigîrî.” MERKEZÊ XEBERAN