Çar çengê welatî de cenazeyî ênê wedardayenê, bi destê maye û pîyan, bi destê waye û birayan. Ê tayîna serê, ê tayîna dest û payî, ê tayîna çend parçeyî, ê tayîna zî kulme wele dîna destê maye û pîyan û vanê na kena,no laj, no torin û no nêzo çiyê to yo. Cesedo ke tam bo, bêro nas kerdêne çin o. 

Merdim ke tarîxî de nîyadano, miladî ra ver kî şerî bîyê,  la exlaqê şerî kî  bîyo. Her dişmenî bi exlaqê dişmentîye şer kerdo. Qet nêbo, merdeyan rê, cesedan rê, keye û eqrebayanê serêsîyayan rê bêhurmetîye nêameya kerdenê. Eke ameya kerdêne kî, tarîx de sey barbarîye ameya name kerdêne.  

Rind êno bi mi vîrî. Yew fîrarê xedar û namdarî ra amêne qal kerdêne. No merdim sekvanode xedar bîyo. La bêrê bivînê ke serê cendekê dişmenê xo de ameyo kîstêne. Nê fîrarî,  fasale arda rê dişmenê xo  û çiman ra dûrî, ko de kîşto. Seba ke vergî meyîtî nêwerê, çend rojî cendek terk nêkerdo. Nîyado ke ne kes êno ne kî eşkeno xeberê bido dewe. naye ser, cendekê dişmenê xo kerdo bi paştî û ardo verê berê ey. Meyîtî beno  verê şêmiga ey de nano ro û wexto ke beno rast, hetê lajê merdeyî ra êno kîştêne. Tabî na mesela de kesî egîdîye û heyf girewtena lajekî qeseyî nêkerdêne. Her kesî, seba ke cenaze ko de nêverda û nêkerda para vergan, pesna fîrarî dênê û derheqê cenazeyan de exlaq û qanunê merdimahîye nîşan dênê. Tabî peynîye de rastîye ke bena eşkera, lajê merdeyî yo ke fîrarî kişeno, hem pîyê xo hem kî dişmenê ey-fîrarî, têkîştêde dano we. 

Kurdan pêroyê tarîxê xo  bi nê exlaq, bi nê numuneyan vîyarna. La Kurd ewro dişmenêde bêexlaqî de amo têrî û erdê xo yê pîrozî ser o, keno ke bi exlaq û qanunê şerî xo bişevekno.

Bi seserreyo ke Kurdî dawaya xo ya biheqe de tim û tim rastê hovîye û barbarîye ameyê la tewr yew wext qasê ewroyî Kurdan rê giran nêameyo. Zerê yew serre de çîyê ke qewemîyayê, qet bi yew qanun, bi yew exlaq û bi yew wîjdanî nênê tarif kerdenê. 

Dinya de kamjî şerî de mezelî(goristanî) ameyê talan kerdenê?

Dinya de kamjî şerî de cesedê cinîyan ameyê şelênayenê û teşhîr kerdêne?

Dinya de kamjî şerî de cenazeyî seba ke nêrê naskerdenê ameyê vêşnayenê?

Dinya de kamjî şerî de domanê 10-13 serrîyî sey dişmen ameyê dîyayenê û kişîyê?

Dinya de kamjî dişmênî nêverdo ke wa cenazeyî bêrê girewtenê?

Hêrsê Kurdan o tarîxî êdî bi nefret êno munitêne. Nê qewemîyayîşan, dişmentîya dewlete tayêna rind kerde eşkera. Sûr de, Cizîre de,Hezex de, Gimgim de, Ferqîn de,Kobane û pêroyê Rojavayî de Kurdan nêkerd vîndî, Tirkîya bi xo kerd vîndî. Tirkîya nê cayan de, bi şero bêexlaq û bêqanun kerd vîndî.  

Ne tarîxê merdimahîye, ne kî Kurdî do nînan xo vîra bikerê.