SELAMÎ ASLAN / MA/ŞENGAL
Seke yeno zanayîş çeteyanê DAIŞî Kurdistan de hêrişê xeylê cayanê kurdan kerdbî û nînan ra tewr zaf zî hêrişê Kobanê û Şengalî kerdbî û derbê tewr girdî zî nê cayan de kurdan ra werdbî. Çeteyan hewl daybî ke bitaybetî Şengal de êzidîyan hemînan qetil bikerî. Labelê resayîşê gerîla û şervananê zerrîwaştoxan ra dima xoverdayîşêko tarîxî amebî nîşandayîş.
Nê cayê ke xoverdayîş amebî nîşandayîş ra yewe zî dewa Girzêrikî bîye. Dewa Girzêrikî de bitaybetî endamê keyeyê Metoyî bi hawayo fedayî xover daybî. No keyeyî ra 7 kesî mîyanê nê xoverdayîşî de ca girewtbî. Keyeyê Metoyî ra 4 birayî, yew biraza û 2 datîzayî meterîsan de cayê xo girewtbî. Nê 7 kesan heta guleyê xo yo peyên şer kenî û dima ra esîr kewenî. Labelê bi hewldayîşê xo nê esîrîye ra xelisîyenî.
Babete ser o 7 kesan ra Xwedêda Metoyo ke 4 domanê ci estî, qisey kerd. Metoyî va ‘Mi bi birayê xo Weqal, Mehmud, Evdî û birazayê xo Dewrêş, ma eynî meterîs de bî, labelê datîzayê ma Huseyîn Şemo û Ehmed Huseyîn zî sewbîna meterîs de bî’ û wina dewam kerd: “O wext ma heta serê sibayî xover da. Dima wesayîtê zirxinî ameyî. Herçiqas ke ma panayêne zî sîlehê ma tesîr nêkerdêne. Ez 2 cayê xo ra birîndar bîya. Badê ma xo qata corêne de nimite. Ê zî qata cêre de bî. Birayêk mi kewtbî destê înan, ê waştî ke wa eşhedê xo bîyaro. Labelê birayê mi va ‘îmanê mi Tavusê Melek o’. Çeteyan sereyê birayê mi tira kerdêne, labelê merdimêk ma kewt mabên û xelisna.” Birayê mi çimêkê xo vînî kerd
Metoyî dîyar kerd badê ke gerîlayanê HPG û YJA Starî korîdorê merdiman akerd o ewil derbazê Rojawan, ewja ra zî derbazê Zaxo bîyo û ewja de amelîyat bîyo. Metoyî ard ziwan ke birayê ci Evdîyî pêrodayîş de yew çimê xo vînî kerdo. Meto nika kampa Serdeştî de xo rê dikanêk akerdo pê debara xo keno. Metoyî wina va: “Ma datîzayanê xo ra ti xebere nêgirewt. Ma 3 serrî yo tîya de yî. Ma tîya de yî; çimkî êdî ma înan ra nêtersenî. Se beno wa bibo ma do şer bikerî.”