Kitabê Mem û Zîna Ehmedê Xanîyî ke heta nika açarîyayo ziwanê Almankî, Armenîkî, Erebkî, Rûmkî û Rûskî, nika zî hetê Murad Canşadî ra açarîyayo Kirmanckî.
Weşanxaneyê Roşna ke lehçeya Kirmanckî ser o wayîrê kedêka girde yo, hîrê kitabê neweyî seba çapkerdişî amade kerdî. Nê kitaban ra yê yewine, kitabê Mem û Zîna Ehmedê Xanîyî ke hetê Murad Canşadî ra ameyo açarnayene yo.
Îrfan Sîmserkîsijî zî folklorê dewa xo arê dayo û sey dosya amade kerdo. Kitabo hîrêyin zî kitabê şiîran yê Îdrîs Yazarî yo.
Lehçeya Kirmanckî ver bi vînîbîyayîşî şona û no het de hetê UNESCO ra girîyaya mîyanê lîsteya ziwan û lehçeyê ke ver bi vînîbîyayîşî şonî. Cok ra xebatê nuştekî ke na lehçe ser o benî, zaf muhîm î. Bitaybetî îlanbîyayîşê OHALî ra dima xeylê dezgeyê ke Kirmanckî reyde eleqeder bîyênê, ameyî padayene.
Dezgeyê ke Kirmanckî ser o xebetîyenî û hewl danî Kirmanckî payan ser o bigirî ra yew zî weşanxaneyê Roşna yo. Weşanxaneyê Roşna heta nika bi desan kitabî çap kerdî û no het de xebatê muhîm û erjîyaye kerdî. Weşanxaneyê Roşna nika zî hîrê kitabî amade kerdî û seba çapkerdişî erşawitî çapxane.
Goreyê xebera ke keyepelê Zazaki.netî ser o, weşanxaneyê Roşna hîrê kitabî seba çapkerdişî erşawitî çapxane. Nê kitaban ra yew kitabê Mem û Zîna Ehmedê Xanîyî ke Murad Canşadî Kurmancî ra açarnayo Kirmanckî. Kitabo bîn bi nameyê Sîmserkîsî yê Îrfan Sîmserkîsijî yo û kitabo hîrêyin zî yê kitabê şîîran yê bi nameyê Destê Zemanî yê Îdrîs Yazarî yo. Goreyê xebera keyepelî, emser bi nê kitaban pêro pîya çar kitabî vejîyenî û pêro pîya kitabê ke weşanxaneyê Roşna ra vejîyayî pancas ra vîyartî.
Canşadî 2015 de dest bi tercumekerdişî kerdo
Kitabê Mem û Zîna Ehmedê Xanîyî ke heta nika açarîyayo ziwanê Almankî, Armenîkî, Erebkî, Rûmkî û Rûskî, nika zî hetê Murad Canşadî ra açarîyayo Kirmanckî. Murad Canşado ke zîndan de maneno û cezaya muebedî girewto, heta nika çend kitabê bînî yê Kirmanckî nuştî. No eserê Ehmedê Xanîyî ke 60 qisimî û 2657 beytan ra pê yeno, heta nika tercumeyê Kirmanckî nêbibi. Canşadî 2015 de dest bi tercumekerdişê Mem û Zîne kerdo û no het de îdareyê zîndanî xeylê zehmetî ey rê vetî. Seke yeno zanayene, Ehmedê Xanîyî eserê xo 10 heceyan ser o awan kerdo, la seba ke wextê tercumeyî de metin xo tim zêde keno, Canşadî 13 heceyan ser o awan kerdo.
Sîmserkîsijî folklorê dewa xo arê dayo
Îrfan Sîmserkîsijî folklorê dewa xo arê dayo û kerdo kitab. Sîmserkîsî vateyê verênan, îdyom, çibenok, lezvate, dua, sond, zewt, aforîzmayanê pîlanê dewe, estanike, deyîre û melumatê derheqê dewe de û sewbîna gelek çîyê bînî yê dewa xo kom kerdî û sey dosya amade kerdî. Kitabo hîrêyin zî kitabê şiîran yê Îdrîs Yazarî yo. Seke yeno zanayene Yazarî rojnameyê Newepelî û kovara Şewçila de nuştêne. No kitab do bibo kitabo dîyine yê Yazarî.
AMED