Çend rojî verê Meletî de taxa Cemal Gurselî de banê elewîyan ameybî nîşankerdiş. Vera nîşankerdişê bananê elewîyan de yew reaksîyon zî elewîyanê Dîlokî ra ame.
Babete ser o Serekê Şûbeya Federasyonê Komeleyê Kulturê Elewîyan yê Dîlokî Yilmaz Buyukdelenî qisey kerd. Buyukdelenî va ‘bi nîşankerdişê banan hewl danî elewîyan bietirnî’ û wina dewam kerd: “Bi no hawa hewl danî elewî û sunîyan bîyarî dûştê yewbînan, labelê şaş î. Çimkî êdî her di hetî zî nînî dûştê yewbînan. Wazenî hedîseyê Gurgumî newe ra ganî bikerî. Êdî elewî û îraderakarê elewîyan hesas hereket kenî. Kayê winasî êdî nê erdan de pere nêkenî.”
Buyukdelenî dewamê qiseykerdişê xo de va ‘taxe de heskerdiş û rêzgirewtiş esto’ û wina domna: “Cok ra nê hewldayîşî veng î. Nêşênî nîfaq bierzî mîyanê her di bawerîyan û endamanê bawerîyan bîyarî dûştê yewbînan. Şar êdî nê kayan fam kerdî. Ganî yê ke banan nîşan kerdî, bêrî tepiştiş û teslîmê mehkeme bibî. No hereket tena verê elewîyan de nêameyo kerdiş, vera heme komelî de ameyo kerdiş. Ma hedîseyanê winasîyan ancax bi yewîye eşkenî derbaz bikerî.”
MA/DÎLOK