Bi averşîyayîşê teknolojîyî xeylê meslegê ke bi keda destan benî, vînî bîyî yan zî ver bi vînîbîyayîşî de yî. Nê meslegan ra yewe zî sifirkarî ya. Sûka Sifirkaran ke qezaya Eyyûbîye ya Riha de ya xeylê sifirkaran averşîyayîşê teknolojî û problemanê ekonomîkan ver dikanê xo padayî.
Na sûke de verê cû nizdîyê 80 westayî estbî, labelê nika tena 3 westayî mendî. Sûka ke verê cû bi vengê çakuçan namdar bîye ra êdî vengê çakuçan zî nîno. Westayan ra Halîl Çalişirî va ‘verê cû na sûke de vengê çakuçan ra merdiman çîyêk nêeşnawitêne’ û wina dewam kerd: “Nika 3-4 westayî mendî. Badê ke elemîyon û krom kel-melan de ameyî bikarardene, kare ma erjê xo vînî kerd. Nika nê westayî ti kar nêkenî. Mecbûr î ke debara xo bikerî, coka xebetîyenî.”
Çalişirî dîyar kerd ke meslegê sifirkarîye her ke şono vînî beno û wina va: “Heta ke ti kesî problemanê ma goşdarî nêkerd. Destek nêdîyeno ma. Êdî hêvîya ma nêmenda. Ez nê meslegî pêşnîyazê ti kesî nêkena. Çimkî ameyoxê nê meslegî çin o, her ke şono vînî beno. Çend serrî ra pey ma do vengêko mendo zî seh nêkerî.”
Ma çîyêk qezenç nêkenî
Westa Mehmet Çîrkîno ke 12 serrîya xo ra nata nê karî keno zî wina va: “Verê cû ma nê meslegî ra zaf baş qezenç kerdêne. Labelê êdî ma çîyêk qezenç nêkenî. Ez nêşêna qezenç bikera ke pere bida xebatkarê xo. Verê cû pere zaf muhîm nêbi. Ya muhîme musayîşê meslegî bî. Labelê nika 3 westayî mendî. Êdî ti kes muhîmî nêdano nê meslegî. Çimkî ti zaf kede danî, labelê pere qezenç nêkenî. Ez nika tena seba ke wext derbas bibo, kena. Êdî ti kes erj nêdano nê hunerî. Eke no mesleg vînî bibo, o wext do qîmetê ci bêro famkerdene, labelê o wext zî do erey bibo.”