Komîsyonê Tehqîqatî yê Mîyanneteweyî yê Xoserî yê Sûrîye yê Neteweyê Yewbîyayeyî (NY) semedê Roniştişanê Heqanê Merdiman ê 42. yê Konseyê Heqanê Merdiman ê Neteweyê Yewbîyayeyî yê ke 9ê Êlule de dest pêkerdî, raporêk hedre kerd. Rapor de bale ameye antene binpaykardişê heqanê merdiman ser.
Rapor de derheqê hêrişanê vera şarê Efrînî de ame vîrardene ke seke Efrîn kewto binê kontrolê dewleta Tirkî û çeteyanê ci ra nata problemê asayîşî dewam kenê û wina ame vatene: “Hetê çeteyan ya zî grûbanê bisîlehan ra Kurdan rê îşkence yeno kerdene û heme heqê înan yenê binpaykerdene. Ê ke peyser agêrenê Efrînî destûr nêdîyeno ke şirê binê bananê xo û dest nîyeno ser mal û milkê şarî. Mîrasê tarîxî û kulturkî yeno çinkerdene. Cinî û qicê kênayî bizorî yenê qefilnayene û reyna nuqtayanê kontrolî de raştê tacîzî yenê. Nê heme hêriş, zext û binpaykerdişê heqan ê ke çarçewaya sucanê merdimîye de yê bi destê makamanê Tirkî yenê kerdene.”
Rapor de reyna bale ameye antene şertanê kampanê Hol, Roj û Ayn îsa yê Rojawanî yê ke keyeyê çeteyanê DAÎŞî zî tede manenê ser û ame vatene ke problemê înan ê cîdî estî. Peynîya raporî de semedê werte ra wedartişê binpaykerdişê heqanê herra Sûrîye pêşnîyazî ameyî kerdene.
ANF / CENEVRE