CAFER CAFO / ANHA/ŞEHBA
Dewleta Tirkî û çeteyê ci ke Efrîn de qetlîyam, remnayîş û talanî kenî, bajar de mekananê tarîxîyan rijnenî û qirkerdişê tarîxî û kulturî virazenî. Nê dagîrkeran heta nika xeylê mekananê tarîxî rijnayî û eseranê tarîxîyan remnayî Tirkîya û Ewropa.
Mudirîya Arkeolojîyî ya Kantonê Efrînî zî nê texrîbatî vejena werte. Hemserekê Mudirîya Arkeolojîyî Hemîd Nasirî dîyar kerd ke dewleta Tirkî Efrîn de qirkerdişê tarîxî û kulturî virazena. Nasirî da zanayene ke dewleta Tirkî çend rojî verê bi teyarayan Eyn Dara bombe kerda û wina dewam kerd: “Aşmêk verê ma musayî ke ewja de bi makîneyanê karî kindo û bi seyan eserê tarîxîyî ameyî remnayene.”
Nasirî va ‘cayê tarîxîyan dima ra açarnayî qerargehê leşkerî’ û wina domna: “Girê Cindirêsî verê kindo, dima ra kerdo qerargeh. Îxtîmal esto ke nê mekanî bi temamî çin bibî. Reyna girê Serdênkê, Ereb Şêxo û Ziravkê zî bi temamî ameyî texrîbkerdene. Dewa Beradê ke lîsteya mîrasê kulturî yê dinya de ca gêna zî raştê hêrişê dagîrkeran ameya. Nê cayî nika çinbîyayîş reyde têrî yî. Ganî Milletê Yewbîyayeyî û UNESCO wezîfeyê xo bikerî. Ganî Efrîn de komîteyêka mîyanneteweyî bêra awankerdene.”