Efrînijan xo newe ra rêxistine kerd

Bi sehezaran efrînijê ke hêriş û dagîrkerîya dewleta Tirkî ver mecbûr mendî ke ca û warê xo biteriknî, koçê herêma Şehba kerd. Efrînijî kampanê Şehba, Berxwedan, Serdem, Efrîn û Vegerî de bica bîyî. Efrînijî nê cayan de xo newe ra rêxistine kerdî û 8 konseyî awan kerdî.

Efrînijan cuya komunale esas girewte û kampan de komun, meclîs û dezgehê sîvîlî awan kerdî. Efrînijan pêro pîya 132 komunî awan kerdî û nê komunan ra 21ê ci Ehdas de, 13 hebî Babnîs de, 18 hebî Fafîn, 26 hebî Til Rifet û 13 hebî zî Şêrawa de awan kerdî. Efrînijan bin banê komunî de komîteyê weşîye, perwerde, şaredarîye, cinî, aştî û ciwanan awan kerdî.

Ehmed Ebdilmenan Oso yo ke Kampa Serdemî de cuyeno, dîyar kerd ke ê komunan de xo rêxistine kenî û wina domna: “Ma cuya xo bi ruhê komunalî domnenî. Heme lazimîyê şarî bi komunan yeno ca.” Emîne Xelîle zî daye zanayene ke tena waştişêkê şarî esto, o zî agêrayîşê Efrînî yo.

Seba azadîye lazimîye bi hewldayîşî esta

Hemserekê Meclîsê Kantonê Efrînî Mihemed Nesoyî zî va ‘şar 58 rojî bi hawayo tarîxî vera dewleta Tirkî de xoverd da’ û wina dewam kerd: “No xoverdayîş do hertim bêro zanayene. Tayê rêxistinê ke îdîa kenî destek danî şarî estî. Labelê nê rêxistinî bi hawayo şeklî estî. Nê tena seba menfîetanê xo kar kenî. Şar tena azadîya xo wazeno.”

Hemserekê Meclîsê Caardişî yê Efrînî Bekir Eloyî zî va ‘şar xebatanê rêxistinkerdişî domneno’ û wina dewam kerd: “Seba azadîya Efrînî têkoşîno hempar lazim o. Konseyê Perwerde û Musnayîşî seba ke domanî psîkolojîyê şerî derbas bikerî, rolêko gird kay keno.”