Ewro 27’ê Teşrîne 37. serragêra ronayişê PKK yo. Toximê PKK serranê 1973-1974’an de, bi rayverînê Rayverê Şarê Kurd Abdullah Ocalan’î de, Enqera Çûbûk û Tuzluçayir de erziya. Bi kombiyayinê 1976’î yê Enqera Dîkmen de qerarê partîbiyîn girotiya. Çarçoweyê no qerarî de, koma şoreşgeran verê xo da Kurdistan û nezdiyê 2 serran gureyîn ramit. Na koma werdî-qijkek wextê kilmî miyan de Kurdistan de veng da, zey Hereketê Apociyan amê silasnayen.
Komî ra hetê partîbiyîn
Zerreyê didi serran de Koma Apociyan bedelê gird û giranî day. Rayveranê Hereketî ra Hakî Karer, o ke Dîlok de gureyînî ramit, 18’ê Gulan a 1977’î de ebi jû êrişa qontrayin de kişiya. Badê kiştişê Karer’î, Hereketê Apociyan lez da gureyînanê xo û sûkanê Kurdistan de bi seyan kombiyayişî viraştî. Badê nê kombiyayin û gureyînan, Hereketê Apociyan kombiyayişê tewr muhîm û tarixî viraşt. Kombiyayin 27’ê Mijdar’a 1978’î de qezayê Amed Licê, dewa Fîs de viraziya. 22 kadroyê rayver tewrê kombiyayin bî. No kombiyayin zey Kongreyê ronayenê Partiya Karkerên Kurdistan PKK îlan bi.
Ronayiş û îlanê PKK Kurdistan, Tirkiye û pêrokîn dinya de veng da. A roj ra tepiya, Hereketê Apociyan, nameyê Partiya Karkerên Kurdistan PKK girot. Wextê zaf kilmî miyan de, nameyê PKK vilayê Kurdistanî û metropolanê Tirkiye bî. Wextî ra PKK bî omidê xelesnayişê şarê Kurd. Nayî ra bî hedefê hêrişanê gird yê dewleta Tirk.
Artêşa Tirk 12’ê Îlon’a 1980 de serva ke verniyê PKK bigîro, derbe ya eskerî viraşt. Hedefê esasî yê darbekaran PKK bi. Dewlet û darbekaranê ci serva-seweta ke PKK werte ra hewadê, Kurdistan açarna zey zîndan û zilmxane.
Xoverdayişê zindanî
Kadroyê PKK yê ke girotî, eştî zîndanan, îşkence û komkiştenanê giranî ra ravêrnay. Girotxaneyan de zî Apociyan ebi xoverdayişê tarixî ferqê PKK damusnay. Şexs dê Mazlûm Dogan, Kemal Pîr, M. Xeyrî Durmuş, Mehmût Zengin, Ali Çîçegan de, kadroyanê ravyer ê PKK, zîndanî zî açarnay zey cay”e xoverdayiş û tekoşînî. Înan şertanê zehmet yê zîndanî de bi xoverdayişê tarixî, pêrokîn planê darbekaran veng-pûç vetî. Apociyan bi no vinderdiş û xoverdayişî mesajê wayirvetinê PKK û berzkerdinê tekoşînî day şarê Kurd.
Hemleya 15’ê Tebax’î
Badê xoverdayişê zindanan PKK, gam bi gam hadreyînê destcikerdişê tekoşîna eskerî kerd. PKK, 15’ê Tebax’a 1984’î de, bi fermandarînê Mashûm Korkmaz’î de fîşega siftayin teqîna û tekoşînê eskerî dest kerd ci. Hereketê Serbestî yê Kurdistan, bi rayverîna Ocalan’î de, zerre û teberê welatî de bi veng û îradeyê Kurdan.
Destcikerdinê serhewedayinan
Serra 1989 ra tepiya, hinî Kurdistan de demê newe û demê serhewedayinan dest kerd ci. Serhewedayinê ke 1989’î de destkerdî ci vilayê Nisêbîn, Hezex, Sîlopya, Mîdyad, Cizîr, Pirsûs û Amed bî. Serhewedayinî verra dewlet zey derbeyê da gird bî. Herzewbîn homet-civakî de zî vurnayinê zihnî, kiltûrî û sosyal viraştî. Wextî miyan de welat û teberê welatî de, PKK bî hereketê mîlyonan û omidê azadî, demokrasî û sosyalîzmî.
Komployê mavên-dewletî
Girdbiyîna PKK dewleta tirk û xeylê quwetanê mavên-netewî tersna. Cok ra 9’ê Cotmeng’a 1998’î de verra Rayverê Şarê Kurd Abdullah Ocalan’î de Komployê mavên-dewletî viraziya û 15’ê Şibat’a 1999’î de Ocalan hesîr girot. La şarê Kurd dormeyê rayverê xo de bî xelekê da adirîn. Kurdistanijan her ca açarna cayê nûmayişî. 80 ra vêşî cenî û camêrdan ganê xo day ver adir û komplo protesto kerdî. Wastenê tesfiyekerdişê PKK yê quwetanê maben-netewî nêresya hedefê xo, PKK bi omidê serkewtiş yê mîlyonan. Badê komployî Ocalan’î ebi îrade, paradîgma û stratejiyê newî komplo veng-tol vet, raya ronayinê netewa-demokratîk akerd.
PKK şewq da şoreşê Rojawa
PKK ya ke Bakûrê Kurdistan de roniya, xo vilayê pêrokîn leteyanê welat kerd. Başûr, Rojawa û Rojhelatê Kurdistanî de, PKK bi hedefê ronayinê sîstema demokratîk û netewa-demokratîk de tekoşînê do gird ramit. Rojawa de şoreşê şarî viraşt, Bakur de rayverînê xoser roj bi roj înşa beno. Tekoşîn û xoverdayişê 37 serran de PKK, tenya sînoranê Kurdistan nê, pêrokîn mintiqeya Rojhelata Miyanî tesîr kerd û vurnayişê girdî rona.
Omidê pêrokîn şaran
Roja ewroyî de PKK him Rojhelatê Miyanî de, him kî pêrokîn siyasetê dinya de aktorê da gird û esasî ya. Efsaneyê no hereketo ke serranê 1970’î de, bi 5-6 kesan dest kerd ci ewro zî rameno. PKK xoverdayişê verra faşîzmê dewleta Tirk, verra çeteyanê DAİŞ ra piya, onca-fina eleqeyê pêrokîn dinya ant xo ser. Û reyna damusnayen ke PKK Kurdistan ra piya, omidê pêrokîn şaranê bindest yê dinya yo.
37. serriya PKK Bakûr, Başûr, Rojhelat, Rojawayê Kurdistan û teberê welat de bi kêfweşî û coşê da gird bimbaber bena.
NAVENDÊ XEBERAN
Destan ramena
Fermandarînê Qerargeha Merkezê Pawitinê Şarî jî 37. serraçarnayinê ronayinê PKK bi jû damûstayin bimbarek kerd. Damûsnayin de Merkezê Pawitinê Şarî ard ziwan ke, rastînê PKK, rastînê şehîdan o û no çarçowe de heme şehîdê azadî ardî vîrî.
Mesaja Fermandarînê Merkezê Pawitinê Şarî wina dewam kena: Serva-qandê femkerdinê raştiya PKK, gerek raştiya şehadeta Hakî, Mazlûm, Kemal, Xeyrî, Sara, Egîd, Bêrîtan, Zîlan, Erdal, Şîlan, Viyan, Adil, Nûda, Rûstem, Xebat, Mehmet, Rojîn, Hisên, Reşîd, Şervan û Baran’an bîrê fehm kerdin.
Şiyayişê verra serbestî
Fermandarîn va, ma dê dawa azadiyê şehîdan biresnê serkewtiş. Merkezê Pawitinê Şarî eleqe ant rolê Rayverê Şarê Kurd Abdullah Ocalan û xoverdayişê şarî jî ser û wina vat: ‘Rayver Apo’yî rayverîna xoverdayişî kerd. Ceniya Kurd zî bi PKK ra piya, bî wayirê îradî û bi partîbiyayinê sewiyê şoreşê cenî vet werte. PKK şarê Kurd kerd wayirê quwet û îradeyî. 7 serrey ra hetanî 70 serrî, şarê Kurd bi qerardarînê gird, vera azadî şino. Xoverdayişê Şengal, Rojava û Bakurê Kurdistanî jî, muhîmîn û rayverînê felsefe û rihê PKK fina bîn rafîna ver çiman. Damûsnayin de vajiyayo ki tarîxa PKK tarîxe xoverdayişê destanî yo û fina bîn sozê serkewtinî da û roşanê 27’ê Mijdar’î şarê Kurd rê bimbarek kerd.
BEHDÎNAN/ANF
Wayirê merdimî vejiya
Meclîsê Êzidiyanê Şengal zî Serragêra 37’în yê ronayinê PKK bimbarek kerd. Meclîsî va, PKK wayirê merdimî vejiya.
Derheqê 37. serragêra ronayinê PKK de jû damûstayin zî koyanê Şengal ra amê. Meclîsa Êzdiyanê Şengal jî derheqê serraçarnayinê ronayinê PKK de damûsnayinê da û ronayinê PKK bimbarek kerd, pêrokîn şehîdê Kurdistan’î ard vîrî.
PKK qûwetê pawiten yê pêrokîn Rojhelatê Miyanî gêna
Meclîsî eleqe ant muhîmînê têkoşînê PKK ser û wina vat: Tekoşînê bi ked û guniya şehîdan dayiya, ewro netîceyanê xo dano. Quwetê Pawitinê PKK nika pêrokîn Rojhelatê Miyanî pawenê. Gerîlayê serbestî, bi rihê fedaî, hometê Êzidî korîdorê merdimîn ra, ravêrnay û xelesna. Meclîsê Êzidiyanê Şengal fina-reyna serraçarnayinê PKK bimbarek kerd û destegê xo aşkere kerd.
ŞENGAL/ANF