Rayverê neteweyî Öcalan’î her çî, ebi viraştişê kesayetî ra destpa kerd. Şexs dê jew-jû kesî de hometa xo analîz kerd, gam bi gam vûrnayinê civakî viraşt. PKK qasî ke dişmenanê xo ra mijûl bî hendayî zî ebi hometa xo ra mijûl bî û emegê girdî day. Hometa ke dişmenanê ci tepiritî bî bin erdî ewja ra vet, kerd qûwetê da gird û resna asîmanan, hizûrê pêrokîn kaînat de serreyê ci berz kerd. Nika pêrokîn dinya verniya Kurdan de hirmet gêno û sîstema demokratîk û ekolojîk yê Kurdan xo rê zey nimûne gênê.
1-PKK ebi şiyarkerdişê kesayeto ke fikir, kamî, ziwan û îradeyê xo kerdbi vinî ebi ey destpa kar kerd. Hurendiya ters, şikinayiş, qedînayişê omidî, cesaret, îrade û omidê newî afirna.
2-PKK zey polîtîkayanê dişmenanê xo Kurdistan lete nêkerd û goreyê menfaatanê werdî yê partî nê, goreyê menfaatanê pêrokîn şarê Kurd polîtîka ramit, verra Kurdan kotî ra derbe û hêrişî amey ver dê ci vejya, her demî û her cayî de bî pawitoxê şarê xo. Nayî ra yo ke nika bakûr, rojawa, rojhelat û bakûr de sloganê ‘PKK şar o, şar tiya de yo’ berz benê. Na slogan îşaretê raştiyê da gird, îşaretê zonayişê netewbiyîn kena. Fina-reyna e ke Sêwereg ra, Şaqlawa ra, Kirmanşah ra Kurdî şiyê Kobanê û cepheyê xoverdayiş de ca gênê jûbiyena neteweyî rewna ra viraziyaya û sînorê mavêna Kurdistan hewadiyayê.
3-PKK serbestiya ceniyan zey esasê xeta îdeolojiya xo dî û bi perspektîfê ‘raya şoreşa Kurdistan raya serbestiya ceniyan ra ravêrena’ hereket kerd verra zihnîyeta serdest û cinsîyetperwer vejya. Herzewbîn ceniya ke koletî ci rê amêbî ferzkerdin statuyê ci açarna zey stuna civakî. Nayî ra PKK zey partiyê da ceniyan yena hesibnayen. Pêrokîn merciyanê qerar yê PKK de nîmeyê ci cenî ca gênê û bê îradeyê hereketa ceniyan qerar nîno giroten.
4-PKK roja sifte ra heta na roj nêbî pîyon û kaykerdoxê ti kesî. Ne Amerîka, ne Îngilîstan, ne Rûsya, ne Ereban, ne Farsan û ne zî dewletanê statîkoyî yê herem nêşa PKK goreyê menfaatanê xo kar biyarê. PKK tenya jew cayî ra qûwet girot, o zî şarê xo bi. Çewres serriya xo de PKK raştê xeylê hêriş, qetlîam, kay û komployan amê, la ti wext paşteyê xo nêda kesî. Komplo û hêrişanê peynî yê verra Kobanê de zî fina îspat bi ke qûwetê şarê Kurd esto ke ebi îradeyê xo pêrokîn derbeyan veng-tol vejo.
5- PKK eksê sîstema sermayedar ya kapîtalîst û eksê rejîmanê muxafezekar, statîk û cinsîyetperwer yê netew-dewletan stûn û prensîbanê sîstema alternatîf ya demokratîk rind rona. Ebi na xet û sîstema xo ya xoser û azad şarê Kurd serva rojhelatamiyanî biyo model û îlham danê pêrokîn dinya. Çi ke dinya de bi nameyê omid, eşq, weşî, serbestî ke şarî bi hezaran serriyo hesret mendê ebi bedelê giran tekoşîn kenê Kurdiyê.
Endî gerek pêrokîn dugelî nayî qebûl bikerê ke şarê Kurd hetê felsefîk, hetê siyasî, civakî, eskerî biyê qûwetê do gird. Çi ke serva-qandê ke şarê Kurd biresê na merhale bedelê zaf girdî day. Wexto ke behsê ronayişê PKK bîro kerdin gune ma domonê qehreman û egît yê ke romana PKK destpa kerdî Hakî, Mazlûm, Xeyrî, Kemal, Sakîne û bi des hezaranê bîn biyarime vîr. Ma Kurdî deyrdarê înanê û gune no deynî zî ma ebi berzkerdişê ala înan biyarime ca. Şarê Kurd bi rayverîna PKK de gam bi gam nezdiyê serkewtiş, nezdiyê xosereya demokratîk beno. 37. serr de zî va yê PKK do pêrokîn dinya de ravêro.