ERDOGAN ALAYUMAT / MA/STENBOL
Qirkerdişê Sêwasî de 35 roşnvîr, nuştox û hunermendî amebî bi ganî veşnayiş, qetilkarê Sêwasî ra yew zî Ahmet Turan Kiliç bî la belê Kiliç hetê Serekkomar Erdoganî ra ame efûkerdiş. Pêroyina dormeraya demokratîke ra no hedîseyî ra bertek ameyî nîşandayiş.
Qirkerdişê Sêwasî de hurnermend Mazlum Çîmen, pîyê xo Nesîmî Çîmenî vînî kerd. Hunermend Mazlum Çîmen bertek nîşanê efûkerdişê qetilê Sêwasî da û wina vat: “Eke no qetil Serekkomar extîyarî ra efû kerdo se nika hepisxaneyan de çend merdim extîyar estê? Heqê efûkerdişê Serekkomarî ra ameyo dayiş la no heqê xo şono efû qetilan de şuxilneno. Ma efû qetilê Sêwasî qebul nêkenê.”
Edelet qedîyayo
Çîmen dîyar kerd ke êdî vera nêheqîyan de gêj bîyê û wina domna: “Nê nêheqîye hetanî key dewam bikê. Qirkerdişê Sêwasî sucê merdimîye yo. No ser zî efû sucê merdimîye nêbeno. Demo ke doza Qirkerdişê Sêwasî vîyartişo dem ra kewtbî, Serekkomar bi aşkera vat ke şarê ma rê bi xêr bo. No vatişî ra pey no welat de min fam kerd ke edelet qedîyayo.”
Çîmen pare kerd ke demo ke o qerar eşnawito, qet şaşî de nêmendo û wina qedîna: “Ma no welat de do hîna zaf sey nê hedîseyan bibê, no ser ma êdî şaşî de nêmanenê.”