Parlamentera HDPyî ya Edene Meral Daniş Beştaşa ke çend rojî verê tehlîye bîye, derheqê çîyê ke zîndan de cuyaya û averşîyayîşê ke welat de benî ser o qisey kerde. Beştaşe arde vîr ke aye verê cû Komîsyonê Qanûno Bingeyî de xebate kerda û Beştaşe 4 Teşrîna peyêne de tewqîfbîyayîşê hemserekanê HDPyî sey rehîngirewtiş şinase kerde.
Ma tersî ver tewqîf bîy
Beştaşe bale ante tewqîfbîyayîşê înan ser û wina va: “Ma seba ke xebatê qanûno bingeyî û nê asteng bibî, ameyî tewqîfkerdiş. Tarîxê Tirkîya û dinya de ti welat de nêameyo dîyayîş ke endamêk Komîsyonê Qanûno Bingeyî û verfek tewqîf bîyo. Seba ke tersayî ma tewqîf kerdî; neke dosya de çîyêko somut çin o. Her çiqas ke hende zulm ame viraştiş, reyna zî se ra 50ê şarî va nê. Seba ke cinîyî rayberîya têkoşînî kenî, AKP tim hêrişê cinîyan keno.”
Mi rekor şikit
Beştaşe qiseykerdişê xo de qala 45 rojan yê Zîndanê Sîlîvrî kerde û wina va: “Ez 45 rojî tecrîd de menda û dima ra mi girewtî koxuşêko 4 kesî tede mendênê. Kitab nêdîyayêne ma, cayê hilmgirewtişî de kamerayî estbîy. Seba ke cayê hilmgirewtişî de 2 qatî têlî estbîy, ma asmên nêdîyênê. Zîndan de neheqîyî zaf bîy û mi zîndan de rekorê nuştişê waştişnameyan şikna. Hewl danî zîndanan de sîstemêko cîya awan bikerî. Qural û qaîdeyanê zîndanî seba teslîmgirewtişî xebetnayêne.”
Beştaşe qala qeraro ke Mehkeme seba Mustafa Balbayî arde vîr û wina dewam kerde: “Balbayî ra dima Selma Irmake, Îbrahîm Ayhan, Gulser Yildirime zî goreyê ê qerarî ameybî veradayîş. Labelê nika vera ê qerarî de astengîyê girdî estî. Embazê ma 4ê teşrîna peyêne ra nata zîndan de yî. Eke Mehkemeya Qanûno Bingeyî (AYM) no het de qerarêk nêdo, o wext Mehkemeya Heqê Merdiman ya Ewrpa (AÎHM) do bido.”
Beştaşe peynîya qiseykerdişê xo de va bi derbeya YSKyî referandûm de ya ame vetiş û wina qedênaye: “Tirkîya zere û teberê welatî de her kesî girewta dûştê xo. Tirkîya bi taybetî polîtîkayanê xo de dişmenîya kurdan esas gêna û seba ke kurdî nêresî hedefê xo, hêriş kena. Labelê wa bizanî ke polîtîkayê ke kurdî piştî nêdî, sernêkewenî.”
DÎHABER/EDENE