MAHMUT RUVANAS / MA/ÎDIR
Tarîx ra heta roja ma ya ewroyî dej û qewhremanîyê kurdan bi rayîrê dengbêjîye ameyî. Cayo ke kulturê dengbêjî tede dewam keno ra yewe zî Îdir o û Hozan Kazo (Kazim Çakmaz) zî nê dengbêjan ra yo.
Hozan Kazo kilamê ke teyîban ra dengbêjîye museno û nê rojan de derheqê Koyê Agirî û dejê kurdan ser o kilaman vano. Serra 2011î de banta Hozan Kazoyî vejîyaya. Hozan Kazo hamnanî vejîyeno zozanan û heywananê xo ra ewnîyeno, zimistanî zî veyve, merasîm û şewanê taybetan de kilaman vano. Hozan Kazo dîyar keno o dengbêjanê Serhatî xo rê finak gêno. Bitaybetî zî dengbêjan ra Şakiro û Tahîroyî esas gêno.
Hozan Kazo vano ‘dejê ke ameyî/yenî cuyayîş benî esasê kilaman’ û wina dewam keno: “Ez dejanê ewroyînan ser o zî kilaman vana. Koyê Agirî hîna zî ma rê qedexe yo. Destûr nêdîyeno ma şêrî erdanê xo ser. Wexto ke ma şonî zozanan, ma raştê teda û zextê leşkeran yenî. Verê Koyê Agirî de çi ameybî cuyayîş, ewro zî eynî dejî yenî cuyayîş. Ez heta ke vengê mi vejîyeno, dejan kilaman de ana ziwan. Eke ez kilam nêvaja, ez do bifetisîya. Yê ma vera zulmî de veng vetiş o.”
Meraqê ciwanan tay o
Hozan Kazoyî dewamê qiseykerdişê xo de wina va: “Ma verê bi hawayo komî keyeyan de kom bîyênê û kilaman vatênê. Labelê neslo ewroyên sey verê dengbêjîye rê eleqe nîşan nêdano. Verê ma veyveyan de zî kilamanê xo vatênê, labelê ewro veyveyan de orkestra, pîyano û sewbîna yenî cinitiş. Cok ra ciwanî vera xo nêdanî dengbêjîye.”