Xeylê hetanê Başûrê Kurdistanî ra ciwanî seba ke destek bidî çalakîya tirsê ganîye ke 8ê Hezîrane de vera hêriş û dagîrkerîya dewleta tirkî de dîyaybî dest pêkerdene, şîyî zîyaretê çalakgêr û Şehîdgehê Mehmet Karasungurî. Ciwanî Qendîl de beşdarê vîrardişê şehîdê 14ê Temmuze bîyî. Ciwanî badê ke hetê çalakgêran de tay mendî, dima ra verê xo dayî şehîdgeh. Xeylê kesan siloganê ‘Bicuye Xoverdayîşê PKK’, ‘Wa bimiro îxanet’, ‘Şehîd nêmirenî’, ‘Bicuye Rayber Apo’ û sewbîna eştî. Wextê vîrardişê şehîdê 14ê Temmuze de îzehet hetê Serhildan Zîlane ame dayene. Îzehet de ame vatene ke ê roja 14ê Temmuze sey roja xoverdayîşî zanî û wina dewam kerd: “Ma heme şehîdan bi rêzgirewtişî vîr anî. Şehîdê 14ê Temmuze faşîzmê dewleta tirkî qebul nêkerdî. Ma bi înan çalakîya xoverdayîşî daye dest pêkerdene. Eke cayêk de hêriş û dagîrkerîye bibî, vera ci de xoverdayîş zî esto. Ma soz danî ke ma do xoverdayîşê xo gird bikerî. Wa herkes bizano ke vera îxanetî de xoverdayîşêko gird esto. Ma do destûr nêdî dagîrkerîye. Wa cinî, ciwan, extîyar yê Başûr, Vakur, Rojawan û Rojhelatî vera xo bidî Qendîl.” Tevgerê Cinîyê Ciwanî yê Têkoşerî zî îzehetêk dayî. Endama Tevgerî Berîtan Saqize derheqê têkoşînî de mesajê muhîmî dayî. Bi wesîleya 14ê Temmuze tîyatro, muzîk, sînevîzyon û fîlm ameyî nîşan dayene. ROJNEWS/QENDÎL