120 karkerê ke girêdayeyê sendîkaya DÎSKî bîy, seba ke Şaredarîya Bajarê Girdî ya Îzmîrî rê doze akerdî û qezenç kerdî, kar ra ameybî vistiş. Karkeran zî qerarê çalakîye girewtî û 2 rojî pêsero vernîya bînaya şaredarîye de çalakîya roniştişî viraştî. Seba ke walîtî destûr nêdaye, karkerî mecbûr mendî ke mabên bidî çalakîya xo. Babete ser o karkerî qisey kerdî.
Alî Dagdekîno ke 9 serrî xebetîyabî, tena çend rojî seba teqawitbîyayîşê ci mendbî, karî ra ame eştiş, wina va: “Seba ke ma heqê xo pawit, ma ameyî eştiş. Sendîka ma ra va ‘eke şima doza xo biancî, şima kar ra nêerzîyenî. Ma doza xo tepîya ant. Labelê hem ma doza xo ra bîy û hem zî karî ra.”
Bariş Kayayo ke se ra 64ê laşê ci astengdar o zî wina va: “Ganî sendîka hetê kedkaran de ca bigîra. Eke hewce bikero, ma do grev bidî destpêkerdiş.” Yener Asilbayî zî wina va: “Seba ke fitiqê pişt û milî mi de estbîy, ez karî ra ameya eştiş. Şaredar vano ‘ez edalet wazena’, ez zî ci ra edalet wazena.” Cinîya bi nameyê Elîf Sefer Esene wina va:“Seba ke ez cinî ya û dêrsimij a, raştê cîyakarî yena. Ma kar ra vejenî û herinda ma de do merdimanê xo bigîrî. Ma do nêvinderî.”
DÎHABER/ÎZMÎR