Grûbêka oşnvîr, rojnameger û hunermendanê gurgumijan vera xespbîyayîşê şaredarîyan de îzehetêk da û dîyar kerd ke qayûm sey Qetlîyamê Gurgumî barbarî ya û ti qural û qaîde çin o. Parlamentera HDPyî ya Stenbolî Zuleyha Gulume zî wina va: “Eke welatêk de huqûq nêmendbo, o wext xoverdayîş heq o.”

19ê Tebaxe de îqtîdarê AKP û MHPyî şaredarîyê Amed, Wan û Mêrdînî xesp kerdî û qayûmî tayînê şaredarîyan kerdî. Roja ke qayûmî tayîn bîyî ra nata welat û teberê welatî de xeylê cayan de bêmabên çalakîyî yenî viraştene û reaksîyon yenî nîşandayene.

Parlamentera HDPyî ya Stenbolî Zuleyha Gulume va ‘ti bingehê huqûqî yê qayûman çin o’ û wina dewam kerde: “Xora îqtîdar hetê huqûqî de ti huqûq û qanûno bingehî nêşinasneno. Qayûmî netîceyê tehdîdê ‘şima biweçînî zî ma do qayûman tayîn bikerî’ ke weçînayîş ra ver amebi vatene de tayîn bîyî.”

Gulume qiseykerdişê xo de bale ante belgeyê ke 1ê Nîsane de ameyo amadekerdene ser û wina va: “Weçînayîşan ra rojêk dima, qerarêk ameyo girewtene û no het de nuşteyê walîtîye esto. No qerar bi temamî sîyasî yo. Îqtîdarê AKP û MHPyî cayê ke nêşêna bigîro, nika bi rayîrê qayûman gêno. Hetê huqûqî de do tayê gêrayîşê heqî bibî, labelê tîya de ya muhîme wayîrvejîyayîşê şarî yo. Eke vera neheqîyan de reaksîyonî bêrî nîşandayene, o wext îqtîdar eşkenîyo bêro vindarnayene. Huqûq zî seba gêrayîşê heqî metodêk o, labelê eke welatêk de huqûq nêmendbo, xoverdayîş heq o. Ganî ma pêro pîya vera kerdişanê antîdemokratîkan yê AKP û MHPyî de bivinderî.”

Ganî vengê CHPyî ziqaqan de zî berz bibo

Gulume qiseykerdişê xo de qala vindetişê CHPyî zî kerde û wina va: “Ganî CHP hîna bihêz bivindero û hîna zaf çîyan vajo. No veng zî tena salonan de nê, ganî ziqaq û raşteyan de zî berz bibo. Çimkî eke ma pêro pîya wayîrê heqanê xo nêvejyî û probleman çareser nêkerî, o wext ne demokrasî yeno û ne zî azadîye.”

Sey qetlîyamî barbarî ya

Grûbêka roşnvîr, rojnameger û hunermendanê gurgumijan zî vera xespkerdişê şaredarîyan de reaksîyon nîşan da. Îzehetê roşnvîr, rojnameger û hunermendan îzehetêko nuştekî da û dîyar kerd ke xespê îrade qasê Qetlîyamê Gurgumî hovane yo û îradeya şarî nîna xespkerdene.  Îzehet de ameyo vatene ke 19ê Tebaxe de Tirkîya de derbeyêka neweyî ameya viraştene û îzehet wina dewam kerdo: “Na derbe vera îradeya Kurdan de ameya kerdene. 7ê Hezîrana 2015î ke Erdogan vera Kurdan de binkewt ra nata, her roje zextan Kurd û hêzanê demokrasî ser o keno. Nê zextî bi qayûman resayî merhaleyêko newe. Îradeyê şarê ma wezîfe ra ameyî girewtene û dest ser nîyayo qezencanê şarê ma ser de.”

Xoverdayîşê dayîkan çimeyê hêzê ma yo

Îzehet de wina ameyo vatene: “Goreyê ma nê qayûmî qasê Qetlîyamê Gurgumî barbarî ya û ti qural û qaîde çin o. Ma na neheqîye red kenî û ma vanî ke ma do vera nînan de bêveng nêmanî. Ma veng danî hêzanê demokrasî ke wa bi hawayo kolektîf têbigêrî û têkoşîn bidî. Wa dezgehê mîyanneteweyî zî tewirê tesîrinan nîşan bidî. Wa qayûmî şêrî û şaredarî biagêrî kare xo. Xoverdayîşê dayîkan çimeyê hêzê ma yo.”

AMED

 

52 kesan nê metnî îmze kerdo

Roşnvîr, rojnameger û hunermendê ke nê îzehetî îmze kerdî, nê yî: “Ahmet Kiziler, Ahmet Kocamer, Ahmet Deger, Ali Koyluce, Alî Ûsta, Alî Ozşerik, Alî Matûr, Alî Gencer, Alî Orak, Azîz Tûnç, Cemo Dogan, Çagdaş Toprak, Edîbe Golgelî, Elîf Sonzamanci, Erdal Aliçpinar, Fîraz Baran, Firat Îmîrza, Garîp Nûrhak, Haydar Yildirim, Hatîce Çobane, Haydar Gulçîmen, Huseyîn Bakir, Huseyîn Torûn, Huseyîn Sûbaşi, Kendal Manîş, Mazlûm Îşcan, Mazlûm Alî Yildirim, Mehmet Sogut, Mehmet Anteplîoglu, Mûstafa Atici, Mûstafa Sakiz, Mûstafa Bûnûl, Mûstafa Pazarcik, Nîyazî Bakir, Îbrahîm Gumuş, Ozan Emekçî, Oz Alîgul Dogan, Oner Polat, Orhan Orge, Pîr Huseyîn Bîldîk, Resûl Erenler, Rezzan Sobîl, Salman Okmen, Serhat Med, Sûltan Mengî, Şah Sultan, Şukru Yildiz, Şahîn Bozlar, Tûraç Somer, Velî Îşcan, Zeynep Enhase, Zeynel Ateş.”