Swêd de serra 1975î ra nata yo ke perwerdeyê ziwanê dayîke esto. Nê heqî ra qeçekê kurdan zî îstifade kenê. Nika 10 hezaran ra vêşêrî qeçekê kurdan dibistananê Swêdî de kurdkî wanenê. Nê qeçekan ra yew zî torna mi Evîndaya hewt serra ya.
Maya Evînda kurda soran a û bi Evînda ya sorankî û pîyê ci zî kurmanckî qisey keno. Evînda her di lehçeyan zî zana. Labelê a dibistane de kurmanckî wanena.
Evînda Stokholm de kurdkî wanena. Dibistana aye de hîrê qeçekê kurdî kurdkî wanenê. Şaredarîya Stokholmî înan rê mamostayê peyda kerdo. O mamosta hefte de finê şino dibistana Evînda û derse dano aye û embazanê aye.
Rojê mamostayê kurdkî nêşîyo derse. Evînda û embazanê xo ya şinê cayê derse de saetê pawenê, labelê mamosta nîno. Ê xemgîn benê û şinê keyeyê xo.
Hefteyo bîn, wexto ke mamosta yeno dibistane, Evînda û embaza ci Zînê pîya şinê mamostayî het û ci rê vanê: “Ma hefteyo bîn saetê pawokê to mendî. Ti nêamey. Dersa kurdî ma rê zaf muhîm a. Wexto ke ti nîrê derse, xeberê bide maye û pîyê ma ke ma bizanê ti nînê. O wext ma bîleheq saetê raya to nêpawenê û ma şenê çîyêkna bikerê.” Mamosta mat maneno. Verê fehm nêkeno ke qeçekê nikayî zaf biaqil ê û mesûlîyetê xo zanê. O vano qey maye û pîyê înan ê musnayê.
Mamosta bi awayênde mehcûb a keyeyê înan rê telefon keno û sebebê nêşîyayîşê xo yê derse îzeh keno! Maya Evînda vana: “Qeçekî bi heq ê. Eke ti reyna nêşê şirê derse yan xebere bide ma yan zî bide dibistane.” Bi qiseykerdişê mamostayî û maya Evînda ya eşkere beno ke qeçekî bi însîyatîfê xo ya şîyê mamostayî het û “îfadeyê mamostayî giroto”.
Maya Evînda zaf keyfweş bena ke kêna ci dersa kurdkî muhîm vînena û bi însîyatîfê xo ya mamostayê kurdkî ra “hesab persena”.
Eke kurdê pîlî zî hendê qeçekanê kurdan yê hendayê werdîyan berpirsîyarîya xo bizanayê û ziwanê xo rê wayîr bivijîyayê do ewro halê ziwanê ma hewna baş bîyayê. Ez hêvîdar a helwesta Evînda tayê mamosta, may û pîyan û kurdanê bînan rê derse bo.