Parlamentera HDPyî Salîha Aydenîze derheqê hêrişê dagîrkerîye yê Dewleta Tirkan ê vera Vakur û Rojhêlatê Surîye de ANF rê qisey kerd û na babete erjnaye. Salîha Aydenîze dîyar kerde ke hêrişê dagîrkerîye û proseso ke bi weçînitişê 7ê Hezîrane dest pêkerdo, ganî yewbînan ra cîya mêrê erjnayene.
Aydenîze va ‘demo ke şerî dest pêkerd Kurdê Rojawanî û şarê ke herême de yê teberê rejîmî û çeteyan de xeta hîrêyine de têgerayî’ û wina domnaye: “O taw ra bîyo yew modelêko ke bîyo hêvî afirna. Sergêrra Komploya Mîyanneteweyî ya 9ê Teşrîna Verêne de hêrişî dest pêkerdî. Hêrişî bi hemkarîya Dewleta Tirkan û dewletanê hegemonîkî yê ke berpirsîyarê Komploya Mîyanneteweyî ya vera modelê cuya hempare ya Kurdan de ameye kerdene.”
Aydenîze dîyar kerde ke organîzasyono ke Dewleta Tirkî sey “Artêşa Mîllî ya Sûrîye’ şinase kena, çeteyê DAÎŞî, El-Nusra û êyê ke înan ra vêşî mende ra ameyê were û nînan tena ‘kincê’ xo vurnayê. Aydenîze wina va: “Tirkîya çîyo ke DAÎŞî nêeşka Rojawan de bikero, nika bi hemkarîya doçikê DAÎŞî kena ke bi ser bifîno. No hêriş dewamê zîhnîyetê Îttîhat û Terakkî yo, xo spirneno dişmenîya kurdan û vera kurdan de her tewir dişmenîye keno. Hemkarîya DAÎŞî û Tirkîya verê çimanê pêro dinya de ya. Serekê DAÎŞî Ebûbekir El Bexdadî herêma ke 5 kîlometre dûrê sînorê Tirkîya ya û binê kontrolê Tirkîya de ya de ame kîştene û na yewe hemkarîya di hetan eşkera kena. Tirkîya wazena ke bi her rayîr û metodî na mintiqa dagîr bikera.”
‘Eke Kurdî bibê yewe do ser bikewê’
Aydenîze vera hêrişan de bale ante muhîmîya yewîya neteweyî ser û wina va: “Na rewşa ke hêrişî yenê kerdene de ganî ma Kobanê newe ra bîyarî xo vîrî. Aya ke tîya de ma vistî ser yewîya neteweyî ya Kurdan bîye. Kurdan heqê xo yê ke vistê dest pêro dinya rê beyan kerdî. Eke Kurdî nika bibê yewe û her ware de bi rengekê hemparî têbigerê do statu, ziwan û kulturê xo qezenç bikerî. Aya girînge yewîya neteweyî ya.”
AMED