Unîversîteyê Galatasarayî ra Doç. Dr. Cem Ozatalayî derheqê polîtîkayanê teberî yê Tirkîya de qisey kerd û vînayîşê xo ardî ziwan. Ozatalayî va ‘AKP wexto ke 2002 de ame îqtîdar polîtîkayê ke merkezê ci de Yewîya Ewropa (YE) estbî meşnayêne, labelê 2007 de wexto ke Sarkozy Fransa de bî îqtîdar û dima ra Almanya de zî Angela Merkele têkilîya xo kêmî kerde, o wext Tirkîya zî YE reyde problemî cuyaye’ û wina domna: “Wezîrê Karê Teberî yê o wextî Ahmet Davutogluyî kitabê bi nameyê ‘Stratejîk Derînlîk’ nuştbî û no kitab zî bi zîhnîyetê Neo Osmanî amebî nuştiş. Xora badê ke ‘wisarê ereban’ dest pêkerd, Tirkîya zî herême de polîtîkayê ‘hîrakerdişê warî’ daye meşnayîş.”
Rûsya xebetnena
Ozatalayî dewamê qiseykerdişê xo de va ‘Rûsya û Îran seba ke herême de tesîrê Amerîka kêmî bikerî, Tirkîya reyde mabênê xo baş tepişenî’ û wina dewam kerd: “Rûsya vera NATO de Tirkîyaye sey kozêk xebetnena. Tirkîya seba ke masaya ke Rûsya de do bêro awankerdiş de ca bigiro, hende Bab ser de israr kena. Tirkîya seba ke bişînbo, vajo ‘ez zî esta’ operasyonê Babî meşnena û wazena bi no hawa piştîya Amerîka bigira. Labelê heta nika Amerîka ra piştîdayîş nêgirewta. Weçînîyayîşê Donald Trumpî seba Tirkîya hêvîyêk viraşt. Trump kesêko ke goreyê her şert û mercî qiseykerdişê ci bibedilîyo yo. Goreyê mi do polîtîkayê Amerîka nêbedilîyî; do têkilîya ci bi kurdan dewam bikera. Eke Tirkîya vera PKKyî de operasyonê teberê sînorî bikero do sernêkewo. Eke Tirkîya o wext HDP û PYD reyde hereket bikerdêne, o wext do qezenç bikerdêne.
Proseso zehmetin
Ozatalayî peynîya qiseykerdişê xo de bale ant pêvînayîşê Astana ke ewro dest pêkenî û qiseykerdişê xo wina qedêna: “Pêvînayîşo ke kurdî tede ca nêgirî, sernêkeweno. Eke hêzê ke şer bikerî masa ser de nêronişî şima do senî adirbest bivirazî? No prosesêko xeylê zehmetin o. Ti kes piştî nêdano estena Tirkîya ya pêvînayîşan de. Goreyê mi do ti giranîya Tirkîya masa de çinêba. Yê ke hetê leşkerî de serbikewo û piştîdayîşê şarî bigiro, do masa de wayîrê vatişî bibo. Ti serkewtişê leşkerî yê Tirkîya çin o û şar zî piştî nêdano Tirkîya.”
YASÎN KOBULAN / SADÎYE ESER / DÎHABER / STENBOL