Badê ke hetê partîyan ra namzedê parlamenterîye ameyî aşkerekerdiş, namzedî vera xo dayî herêmanê xo û lez dîyayo xebatanê weçînayîşî. Nê namzedan ra Alîcan Onlu û Meral Hanbayat Yeşîle zî Dêrsim de sey namzedî ameyî nîşandayîş û xebatanê xo domnenî.
Onluyo ke eynî wext de Hetkarê Hemserekîya HDPyî yo, weçînayîşê 24ê Hezîrane ser o qisey kerd û rewşa partîya xo ser o vînayîşê xo ard ziwan. Onluyî dîyar kerd ke seba ke îqtîdar nêşêno welat îdare bikero, Tirkîya bi hawayo etirîyaye şona weçînayîş û wina domna: “AKP zano ke do şêro, cok ra weçînayîş virazeno. Tirkîya hertim ser dişmenîya kurdan ra yena îdarekerdiş. Bitaybetî hêrişkerdişê AKPyî yê Efrînî peynîya ci ard. Eke AKP Efrîn de serbikewtêne, ewro weçînayîş nêviraştêne.”
Onluyî bale ant ser awanbîyayîşê 2 îttîfaqanê raştî ser û wina va: “Amancê awanbîyayîşê nê îttîfaqan o bi ke HDP teberê îttîfaqî de biverdî. Ewro heme sîyasetmedarî tewqîfkerde yî û hetta namzedê HDPyî Selahattîn Demîrtaş zî tewqîfkerde yo. Rîskê bendê weçînayîşî tena problemê ma nîyo, problemê Tirkîya yo. Yan do rejîmê yew merdimî bêro yan zî do şarî destek bidî HDP. Eke HDP binê bendê weçînayîşî de bimanî, o wext do heme şarê Tirkîya vînî bikerî. HDP do qederê Tirkîya dîyar bikero. Ma do hesabê Qirkerdişê Dêrsimî 24ê Hezîrane de bipersî. Berpirsîyarîyêka winasî ya elewîyan esta. Dêrsimijî do 24ê Hezîrane de cewabêko baş bidî.”
MA / DÊRSIM