No çend serrî yo ke dewlete hewl dana Heskîfî birijna û herinda ci de Barajê Ilisû biviraza. Bitaybetî çend rojanê peyênan de lez dîyayo viraştişê barajî. Cok ra Qeleya Darpxaneyî yê Heskîfî bi dînamîtan ameybî teqnayîş. 

Parlamenterê HDPyî yê Êlihî Mehmet Alî Aslanî zî vera nê rijnayîşî de çalakîyêk dabî destpêkerdiş û xo Heskîf de zîncîr kerdbî. Aslano ke 17ê Tebaxe de çalakîye dabî destpêkerdiş, çalakîya xo qedêna. Babete ser o Aslanî qisey kerd. 

Aslanî seba ke piştî dayî, rayapêroyî rê spas kerd û wina va: “Ma do vera rijnayîşî de çalakî û aktîvîteyanê xo bidomnî. Maqamê fermî pawitişê kulturê tarîxî ra berpirsîyar î, eke nêpawî, o wext do şar çalakîye bivirazo. Dewlete û hukmat vera qanûno bingeyî de suc kenî. Amîrê Îdarî yê Mulkî û yê ke emir dayî, do bêrî mehkemekerdiş.”


Ferqê ci û DAIŞî çin o

Aslanî vera polîtîkayanê îqtîdarî de reaksîyon nîşan da û wina va: “Seba enerjîya 40-50 serran merdim senî enerjîyê 12 hezar serranî çinî keno. Enerjîyê kultur û yê tarîxî zî esto. Ez nika mabênêk dana çalakîya xo. Tîya de tarîxê 12 hezar serran bi dînamîtan yena teqnayîş û mabênê nêyî û yê teqnayîşê DAIŞî yê Peykerê Buda, Muzeya Mûsilî û Bajaro Antîk yê Palmîra de ti cîyayî çin o.”


Ma do hîra bikerî

Aslanî bale ant polîtîkayê hukmatê AKPyî yê vera şarê kurd û tarîxê Mezopotamya de ser û wina va: “Heskîf mabênê tarîx, ewro û sibayî de sey pirrdêk o, merdim kura ra ameyo û ver bi kura şono, nîşanê ci dano. Eke rijnayîş nêvindero, ma do çalakîyanê xo hîra bikerî. Ma veng danî yê ke wazenî nê tarîxî çin bikerî rê. Eke rijnayîş nêvindero, ma do çalakîyanê cîya-cîyayan bivirazî. Ez seba hesasîyetî veng dana herkesî, ma do Heskîfî bipawî.” 


 DÎHABER/ANF



Ganî ma vengê xo berz bikerî


Parlamentera HDPyî ya Colemêrgî Selma Irmaka ke Zîndanê Kandira de ya, derheqê hêrişê ke Sûr û Heskîfî ser de benî de mesajêk erşawite. 

Parlamentere Irmake mesajê xo de wina vato: “Heskîfo ke dergûşa şaristanî ya û Sûro ke zerrîya Amedî yo, nika rijnayîşî reyde têrî yî. Ez çalakîya Mehmet Alî Aslanî silam kena. Eke Heskîf binê awe de bimano, tena tarîxê nê şaristanî binê awe de nêmaneno, derbe dîyeno vîr, kultur û ziwanê şarî ro. Heskîf bi hezaran tewir heywan û nebatan rê meymandarî keno. Eke rêza şima merdim û tarîxê ci rê çin a, şima heywanan ra çi wazenî? Netîceyê nizdîbîyayîşê hukmatî de bi sehezaran merdimê ma welatê xo de bîyî bextwaştox. Sûrê Amedî de şarê ma herçiqas ke polîtîkayê zext û vêşanîye yenî meşnayîş, reyna zî bananê xo veranêdayî û no hêzêko gird danî ma. Ganî ma do vengê xo berz bikerî.”



Koln de seba Dêrsim û Heskîfî meşîyayîş


Vera rijnayîş û taxrîbkerdişê tebîetê Kurdistanî, bajarê Kolnî yê Almanya de mîtîngêk ameye viraştiş. FEDA, AABF, AGÎF, FDG, Merkezê Komela Kurdê Demokratîkî beşdarê mîtînga ke Bahnhofvorplatz de ameye viraştiş, bîyî. Mîtînge de fotografê ke şewatê Dêrsimî û taxrîbkerdişê Heskîfî nîşan dayênê, ameyî kiriştiş. Heto bîn ra merdimê ke hêrişê terorî yê Barcelona de merdî zî ameyî vîrardiş. 

Mîtînge ra dima meşîyayîşêk zî ame viraştiş. Meşîyayîş de bi megafonî malumat dîya şarî û vilawekî ameyî vilakerdiş. 2 fotografê ke meşîyayîş de ameyî kiriştiş, bale antênê; fotografêk de pezkofîyêka ke orteyê adirî de menda û nêzana se bikera, estbîye. Yê bînî de zî halo verên kehen yê Heskîf û Palmîra estbîy.  


ANF/KOLN