Sey ke yeno zanayîş PDK û YNKyî 7ê hezîrane de îzehetêko ortax daybî û dîyar kerdbîy ke înan qerar girewto ke 25ê êlule de Başûrê Kurdistanî de referandûmêk bivirazî. Babete ser o Nuştox Letîf Feteh Ferecî qisey kerd û va ‘referandûm do seba nimitişê problemanê sîyasî, ekonomîk û komelkî bêro viraştiş.
Ferecî va ‘her çiqas ke yeno îdîakerdiş ke no referandûm seba xoserîya Herêma Kurdistanî yeno viraştiş, reyna zî ez o fikir de nîya’ û wina domna: “Ez hema zî îkna nêbîya ke no referandûm seba tayînkerdişê qederê şarî yeno viraştiş. Ez bawer nêkena ke Mesûd Barzanî zî no het de îkna bîyo. No referandûm vera problemanê zereyîn de sey argumanêk yeno xebetnayîş. Welatê ma de bêedaletî, bêsîstemî, partîcîtî û qetlîyamê ke kerdoxê înan dîyar nîyî, estî. Eke tîya de xoserîye yeno waştiş, o wext ganî sifteyîn Goran, YNK, Yekgirtû, Komela û hetta PDK mîyan ra tayê bivejyî û vajî ‘bêrê ma verê problemanê xo çareser bikerî û dima ra ma bivejyî şarî ver. ”
No îdare bawerî nêdano şarî
Ferecî dewamê qiseykerdişê xo de vist vîrî ke Kerkûk, Şengal, Saîdîye, Xaneqîn, Qeretepe û zaf cayanê bînan de problemê statuyî esto va ganî ma verê nê probleman çareser bikerî.
Seba nimitişî beno
Ferecî bale ant viraştişê referandûmî ser û wina va: “Referandûmo ke ewro yeno viraştiş, seba ke dizdê, talan, bêusûlî û sewbîna bêrî nimitiş, yeno viraştiş. Ganî weçînayîşî bêrî viraştiş. Labelê nêyî vejîyenî vernîya ma û vanî ‘ma do dewlete awan bikerî, weçînayîşan pers mekerê. Wazenî vajî ke; yê ke nêvajo ya xayîn o. Helbûk xayîn yê ke tanqanê dagîrkeran ano Kurdistan, yê ke meaşê şarî nêdano û yê ke dizdê keno yo. Xebera înan çin a ke şar senî cuyeno.
Yewîye şert a
Ferecî vist vîrî ke polîtîkaya ke rêxistin û partîyanê kurdan bîyara têhet, yewîya neteweyî ya û va, “Şertêkê yê nêyî esto. Eke şar bivîno ke ti seba şarî şer kenî, şar to dima yeno. Senî ke seba nêbîyayîşê îxanet, dizdê û talanî rayapêroyî lazim a, ganî seba referandûmî zî rayapêroyî bêra awankerdiş. ”
‘Şar hetê to de ca nêgêno’
Ferecî seba çareserî va ‘ganî cîyayîya mabênê şarî de wedarnî’ û wina qedêna: “Bi çimêko senîn Hewlêr ra ewnîyenî, ganî wina Silêmanî û Kerkûk ra zî biewnî. Ganî şarî îkna bikerî ke ê aşiqê mewkîyan nîyî. Eke merdim nêbo kirmê şarî, şar hetê kê de ca gêno. Serra 1991î ra nata tim bîyî kirmê şarî. Ganî fek kirmê şarî bîyayîşî ra vera bidî. Eke ti hende şarî birîndar bikerî, şar hetê to de ca nêgêno. No hende zelal o.”
RÊBAZ HESEN/ANF/ÇEMÇEMAL